Kyntait u Justice Katakey ïa ka kaiphod u DC ka EJH halor u dewïong ba lap ha Byndihati

By Mawphor News Desk On Dec 13, 2023

Shillong, Nohprah 12 : U Justice Brojendra Prasad Katakey uba dei u khlieh jongka Single Member Committee (SMC) u la kyntait ban pdiang ïa ka kaiphod jong u Deputy Commissioner (DC) ka East Jaintia Hills uba la kam ba u dewiong uba la lap ha lyndet ka Don Bosco College, Byndihati um dei uba dang shu dep tih beaiñ hynrei u dei uba rim uba la dep lum jingkheiñ.
Ha ka kaiphod ba 19 (Interim Report) ba u la ai sha ka ïing Bishar High Court jongka jylla u Justice Katakey u la ong “ Ka jingong jong u DC ba u dewiong ba la lap ha lyndet ka Don Bosco College u dei shi bynta na u dewiong uba la dep lum jingkheiñ naduh u snem 2018 ka long ka bym lah ban pdiang da lei lei ruh halor kine ki nongrim. Ka jaka ba la pynhap ïa u dewiong kumba la kdew da u Addl. Deputy Commissioner East Jaintia Hills ha ka FIR ba u la ujor ha Khliehriat Police Station ha ka 7 tarik u Naiwieng 2023 Khliehriat PS Case No 87(11)23 kaba la kdew ba ka jaka ka hap Latitude 25,318142 bad Longtitude 92,269927 kam ïahap satia bad ka kaiphod jongu Deputy Commissioner ka East Jaintia Hills halor u dewiong ba lum thup ha u 2018 namar ha katei ka por la kdew ba u dewiong u don ha ka jaka N 25.33249 bad E 92373775. Kumta la pynpaw ba hangne shwa la ïapher ka jaka jong u dewiong uba rim bad une uba la lap mynta.
Nalor kata la pynpaw ba wat u I/O uba tohkit halor une u dewiong u la dep pyntip ba une u dewiong uba don mynta um ïadei ha ka jaka bad ka kaiphod jongu Deputy Commissioner East Jaintia Hills 2018.
U Justice Katakey ha ka kaipod u la pynpaw ba ka jaka ba buh ïa u dewiong ba la lum jingkheiñ kat kum ka kaiphod 2018 bad kaei kaba u IO u lap ha ka jingtohkit jong u ha u 2023 ka ïapher bha kumta une u dewiong uba la lap ha lyndet ka Don Bosco College um dei u dewiong uba la dep lum jingkheiñ ha u 2018 kumba la ïathuh da u Mul Sympli. Une u dewiong ha katei ka jaka ha ka jingleit jurip ha ka 7 tarik Naiwieng 2023 u dei uba dang thymmai bad phyrnai bha bad kumta um dei uta u dewiong uba la dep lum jingkheiñ ha u 2018.
La pynpaw shuh shuh ba u DC ha ka kaiphod u la pynpaw tang ïa u dewiong uba don ha lyndet ka Don Bosco College hynrei u khlem pynpaw ïa kiwei ki jaka ba lum thup ïa u dewiong hajan ka Don Bosco College bad ha kiwei ki ar jaka harud ka surok bah ha kaba ha kawei ka jaka lei lei la wah ïa ka jingthoh ba u dei uta u dewiong uba la kurup bad dep lum jingkheiñ.
Kumta u Justice Katakey u la pynpaw ba donkam ban tohkit halor katei ka FIR ba la ujor da u Additional Deputy Commissioner East Jaintia Hills ha ka 7 tarik Naiwieng 2023 bad ïa kane dei ban tohkit da u Pulit Ophisar uba la heh kyrdan.
Nalor kata ym shym la kdew ruh na kaei ka daw khlem ujor FIR ïa u dewiong uba la lap hajan ka Don Bosco College, Byndihati bad kumjuh ruh ha ki ar tylli ki jaka harud ka surok bah. Nalor kane ka Committee ba la khlieh da u Justice Katakey ka la pynpaw ba ki don ki dak tyre trok kiba dang thymmai bha ha katei ka jaka ha ka jingleit jurip ha ka 7 tarik Naiwieng 2023 ha katei ka jaka ba pynhap ïa u dewiong ha lyndet ka Don Bosco College Byndihati kaba kdew shai ba ka jingkit bad shalan beaiñ ïa u dewiong ha katei ka jaka ka bteng beit.
Nalor kata ha ka jingleit jurip jongka Committee sha katei ka jaka ka la lap ba ki don ki krem tih dewiong kiba dang thymmai katba u Executive Magistrate East Jaintia Hills ha ka kaiphod jongu ha ka 8 tarik Naiwieng 2023 u la pynpaw ba ym don satia kita ki krem dewiong kiba thymmai. Katba u kdew pat ba ki don ki ïing sher dara sawdong katei ka jaka kaba kdew ba kitei ki ïing ki dei kiba sah kiba tih dewiong beaiñ ha katei ka jaka.Ka kaiphod ka khlem kdew ruh ba ïa ka Crane kaba la lap hajan ka par tih dewiong ruh la kurup ne em bad lada khlem kurup na kawei ka daw. Kane ka long ka jingpynkheiñ ïa ka hukum ka NGT namar kane ka ïing bishar ka la dep bthah ba dei ban kurup lut ïa baroh ki jait tiar kiba pyndonkam ha ka jingtih dewiong.
Ha kaba ïadei bad ka Weigh Bridge kaba la lap ha lyndet ka Don Bosco College bad ba la ïathuh da u DC ba ka jngtohkit halor kane ka dang ïaid, ka Committee ka la bthah ïa u DC ban ai ïa ka kaiphod halor kane ruh hapoh shitaiew.