Shillong, Nailar 28 : U Myntri Rangbah ka Jylla Conrad K Sangma ha ka sngi Thohdieng, ula plie paidbah ïa ka Ophis building ba thymmai jong ka Tnad Excise ha Lower Lachumiere, Shillong, kaba dei ka jingpynkut ïa ka jingtreikam ka Tnad ba palat sanphew snem na ka Iingwai.
U Myntri ka Tnad Excise Brening A Sangma, u Chief Secretary Dr Shakil Ahammad bad ki Heh Ophisar lem bad ki nongtei ka Tnad Excise kila ïadonlang ha kane ka jingplie Ophis.
Haba kren ha ka jingïalang, u Myntri Rangbah ula batai ïa kane ka jingplie kum ka sngi ban lehkmen ïa ka Tnad bad ruh ïa ka Sorkar Jylla.
“Ka ai jingkmen bad jingsngewhun ïa nga ban plie ïa kane ka building, kaba dei ka jingdawa bala slem jong ka Tnad” ong u Conrad.
Ula ong ba ka Tnad Excise kala synniang shikatdei eh ïa ka pla tyngka ka Jylla bad bynrap ba kane ka building ba thymmai ka long shi bynta jong ka sienjam ka Sorkar ban tei bha ïa ki jingtei.
Haba kren halor ki jingpynroi ïa ki jingtei bala leh ha kine ki phra snem bala leit, u Conrad ula kdew ïa ka jingshna pynbha bad pyntrei ïa ki Iingskul, ki Police Station bad Outpost, ki Ophis ki Block, Primary Health Centre (PHC), Community Health Centre (CHC) bad ki Sub-Centre.
Halor ka jingkiew ka jingpynmih pisa bad ki jingpynkylla ha ka tnad Excise, u Myntri Rangbah ula ïathuh ba ka jinglum khajna ka tnad kala kiew bun shah bha na kumba T.180 klur ha ki phra snem mynshuwa sha ka palat T.500 klur mynta.
“Ngi la shim ïa ka rai kaba heh ban pynïasnoh lang ïa ka Excise bad ka VAT, kaba la khmih lynti ban nang pynkiew shuh shuh ïa ka jinglum khajna” ula ong.
U Conrad u ong ba ha u Nailar 2026, ka Kynhun Myntri kala mynjur ban pynwanlang noh ïa ka VAT halor ka kyiad sha ka Excise Duty da kaba pynkylla ïa ka kyndon 44 bad Schedule V jong ka Meghalaya Value Added Tax Act.
Haba pynpaw ïa ka jingkyrmen ïa ka jingnang kiew shaphrang ka Tnad, u Conrad u khmih lynti ba ka jingioh lum khajna kan sa tam shen ïa ka T.1000 klur.
Ïa kane ka Ophis thymmai ka Tnad Excise la tei ha ka jinglut kaba kot T.14.55 klur bad kan don ïa ka Laboratory, Enforcement Wing, Integrated Excise Management System bad ka Ophis u Commissioner ha kajuh ka building.
