Hadien 100 snem la rah ia kajuh ka stashu Maria ba la rah ha ka proseshon ha u snem 1922

Shillong, Jymmang, 22: Ki riewngeit Katholik jong ki Jyllaniam ha kane ka jylla Meghaya bad ha ka thaiñ Shatei Lammihngi baroh kawei ha une u snem 2022 ki la long kiba donbok ban ïoh bynta ha ka jingrakhe kynmaw burom ïa ka jingdap 100 snem ka jingwan jong ki mishoneri na ka ri Italy na ka jingïasyllok Salesian of Don Bosco (SDB) ha ka 13 tarik, Kyllalyngkot, 1922 bad ka jingdap shi spah snem ka proseshon Maria ba nyngkong eh kaba la long ha Laitumkhrah, Shillong.
Ka jingwan poi jong ki mishoneri Salesian ka long ban bteng ïa ka jingshakri ha ka Bri Sohwaiñ U Trai ha kane ka thaiñ Shatei Lammihngi ka ri India hadien ba ki Phadar Salvatorian na ka ri Germany ki la hap ban mih noh na kane ka thaiñ haba la khie ka Thma Bah Banyngkong (1914-1918). Ïa kane ka thaiñ la peit shipor da ki Phadar Jesuits na Kolkata tad haduh ynda la shimti noh da ki Phadar Salesian ha u snem 1921.
Ka stashu Maria ba la rah ha ka jingïaid proseshon mynta ka sngi u Blei ha Mawlai Parish ka dei kaba la ïoh sei na ka jingpluh ding jong ka Ingmanebah kaba rim ha Laitumkhrah ha sngi Thohdieng Bakhuid jong ka 10 tarik, Ïaiong, 1936 kaba la pynieng nyngkong eh da ki Phadar Salvatorian mynba ki dang don ha kane ka ri Khasi.
Kane ka stashu Maria kaba la ohshrong da ka dieng ha ka ri Italy la buh tyngkai ha Sunny Side, Upper Shillong haduh mynta mynne.
Wat hapdeng ka jingther jong u lapbah uba jur khlem da kynran dien ki paidriewngeit ki la ïashim bynta da ka jingriewblei ban duwai ïa u Rosari Bakhuid bad ban rwai ïa ki jingrwai ïaroh ïa ka Kmie Bneng ka Maria Theisotti ha shilynter lynti.
U Rev. Fr. Roland Kharkrang haba ïathuh sha ki paid riewngeit ïa ka histori hashwa ban pynlong ïa ka jingmane Sakramen hadien ba la pynkut ïa ka jingïaid proseshon, u la ong, “ki Phadar Salesian ki la pynlong ïa ka proseshon Maria banyngkong eh ha kane ka ri Khasi ha 24 tarik Jymmang, 1922 ha Ingmanebah Laitumkhrah ha ka por 6:30 baje janmiet bad la ïaid ter ter kham shaneng ba don ka madan Fire Brigade.”
“Haba ki briew ki la bna shaphang kane ka jingïaid proseshon kaba kim pat ju ïohi mynno mynno ruh ki la wan na kylleng sawdong ka sor Shillong ban ïa peit kai ïa ki Khristan Katholik kiba la ïashim bynta ha kane ka proseshon kaba la long ha ka por janmiet da kaba rah la ki mombati ha ka kti,” u la ong.
“Ki don tang kumba 600 ngut eiei kiba ïaid proseshon bad ha kane ka sngi, kane ka stashu Maria kaba don mynta ka la ïaid lang ha kane ka proseshon,” la ïathuh u Fr. Roland katkum ki jingtip ba la lum na ki jingbuh jingthoh jong ka Balang Katholik ha kane ka Jyllaniambah Shillong.
“Ha kaba kut jong ka proseshon, u nongïalam jong ki Phadar Salesian u Fr. Louis Mathias u la pynkyntang ïa ka Thaiñ Shatei Lammihngi baroh kaweh ha ka jingïada jong ka Maria ka Nongïarap ki Khristan da kaba buh ïa ka jingduwai kaba ong, ‘Ko Maria, ngi pynkyntang ha phi ïa baroh ki lum ki them, baroh ki khlaw ki btap, baroh ki dieng ki siej bad khamtam eh ïa ki briew jong kane ka thaiñ Shatei Lammihngi.’
“Sawphew snem hadien, ha u snem 1962 u Pope John XXIII u la khot ïa ka Dorbar Bah ha Vatican Baar bad ha ka 11 tarik, Risaw, 1962 la plie ïa kane ka Dorbarbah bad u Bishop Stephen Ferrando na Shillong bad u Bishop Orestes Marengo na Dibrugarh ki la leit ban ïashim bynta. U Bishop Ferrando u la ïalam lang ïa u Secretary jong u, u Fr. Mario Bianchi bad ban leit shuti na ka bynta lai bnai sha Italy,’ la ïathuh u Fr. Roland.
“Ha ka 8 tarik, Nailur, 1962, ki shipai ka China ki la sdang ban tur thma sha India da kaba wan rung na Arunachal Pradesh. Baroh ki briew ki la sheptieng,” la bteng u Fr. Roland.
U la ïathuh ba ha une u snem, mynba u dang long tang u khynnah uba dang pule ha Savio Juniorate (ban pynkhreh ïa ka jinglong Riewniam) baroh ki Phadar bad ki khynnah pule ki la hap ban phet sha Madras (ba la tip mynta kum ka Chennai). Na Sacred Heart Theological College bad na Sunny Side ruh ki Phadar ki la mih lut baroh.
“Ha ka por ba ki shipai ka ri China ki la poi haduh Tezpur, ka la wan ka jingbthah na Vatican ïa baroh ki Bishop kiba trei ha kane ka thaiñ Shatei Lammihngi ba ki dei ban leit phai noh sha ka ri Italy. U Bishop Ferrando u la phai ktien da kaba jubab, shaei ngin leit, ki khun Khristan kin leh kumno lada ngi phet. La bunsien ka la wan ka jingbthah ba ki dei ban mih noh,” la ïathuh shuh shuh u Fr. Roland.
“U Bishop Ferrando na Shillong u la telephone ïa u Fr. Bianchi uba don sha ka ri Italy da kaba bthah ban leit ïakynduh ïa u Fr. Pio (u Phadar uba la ïoh ïa ki dien mong jong u Trai Jisu Khrist) ban kylli aiu ngi dei ban leh. U Fr. Bianchi u la leit ïakynduh ïa u Fr. Pio bad mar ïa plie ïa ka jingkhang u Fr. Pio u la kren nyngkong da kaba ong, Phadar Bianchi phi la wan naduh na jngai ban ïakynduh ïa nga, ong ïa ki Bishop jong phi ban ym tieng bad kin shong beit ha ka jaka kaba ki don, kim dei ban sheptieng,” la ïathuh u Fr. Roland.
“Ka Maria ka la kynmaw, ong u Fr. Pio, ba la pynkyntang ïa ka North East ha ka Maria bad kan ym shah ïa ki shipai ka ri China ban leh ïa kaei kaei kaba sniew ïa ka North East. U Fr. Bianchi u shu ang lyngngoh namarba u Fr. Pio u la tip lypa ïa kiei kiei baroh khoit,” u la ong bad bynrap, “kane ka la jia shisha bad tang lai sngi hadien ki shipai ka ri China ki la phaidien noh.”
Arphew snem shwa kata, ka la don sa kawei pat ka jingjia kaba lah ban dei ka jingïadei bad ka jingpynkyntang ïa ka ka North East ha ka Maria Theisotti, la ïathuh shuh shuh une u riewniam ka jingïasyllok Salesian.
“Ha u snem 1942 ka Thma Bah Baar, ki shipai ka ri Japan ki la tur stet bad ki la poi haduh Indonesia, Cambodia bad haduh Burma. Ha kata ka snem 1942 ka la don ka Thma ha Kohima, Nagaland hapdeng ki shipai Phareng bad ki shipai Japan ha ka jaka ba don mynta ka War Cemetery ba mynta kaba bun bha ki Phareng ki la ïap ha kane ka thma.
“Ha une u snem 1942 ki shipai Japan kiba la poi haduh Nagaland ki la phah haduh lai sien ïa ki liengsuiñ ban ther bom ïa ka sor Shillong namarba ka la long ka Military bad Civil Adminstration jong ki Phareng. Ym ban pynshitom ïa ki Khasi hynrei ban pynshitom ïa ki Phareng bad u lyoh uba rben u la tap ïa ka sor Shillong bad ki shipai Japan namarba kim shym la ïohi ïa ka Shillong ki la leit phai noh. Dei na kata ka daw, haba ngi ïoh la ïoh jylla bapura 21, jan 1972, ka la don ka jingkylli ngin jer kumno ïa ka jylla. Uwei u Bengalee u la ai jingmut ban jer kyrteng, ‘Meghalaya, ka jaka shong ki lyoh,” u la bynrap.
“Nga ngeit skhem ba kane ka dei kawei ka jingleh jong ka Maria Theisotti ba la pynkyntang ïa ka North East bad kan ïai ïada ïa ngi haduh kine ki sngi. Mynta ka sngi, ngi la ïalum biang ha ka snem kaba 100 hadien ka prseshon banynkong ban ïaroh ïa ka Maria Theisotti bad kane kajuh ka Maria Theisotti ka la bud, ka la synran ïa ngi bad ka la ïada. Ngi don ïa ka Kmie ngim long khun swet bad kum ka Kmie kaba lum kaba lang bad kaba hikai ïa ki khun.
Ha ka por mynstep, la pynmynta ïa ka Mass Bakhuid da u Provincial jong ka Shillong Provice u Fr. Paul O. Lyngkot bad uba la pynpaw ka jingsngewnguh ïa u Blei Uba la kyrkhu ïa ki jingtrei jong ki Phadar Salesian ha kane ka thaiñ Shatei Lammihngi ym tang ban bet ïa u symbai jingngeit hynrei wat ban pynheh pynsan ïa ki nongshong shong ha ka pule ka puthi bad ka jingai jinghikai ban sengkam sengjam.
Ha ka jingmane Sakramen ha ka por shiteng sngi hadien ka jingïaid proseshon la ai jingkyrkhu da u Vicar General ka Jyllaniambah Shillong u Fr. Richard M. Majaw.
Ka jylli treikam jong ka Shillong Province kaba hap hapoh ka jingpeit jong ka Jingïasyllok Salesian of Don Bosco ka kdup ïa ka Shillong, Nongstoiñ, Jowai, Barrak Valley, Assam, Tripura bad Mizoram.
Ïa kane ka jingrakhe ka jingdap 100 snem ka jingwan trei jong ki Phadar Salesian ha kane ka Jylla Meghalaya bad ha ka thaiñ Shatei Lammihngi yn sa pynkut ha ka 30 tarik, Risaw, 2022 ka ban sa long ha madan Kalbari, Laitumkhrah ha kaba yn sa ïa donlang ruh u Rector Major jong ka Jingïasyllok Salesian na ka ri Italy u Fr. Ángel Fernández Artime.