Wat leh arsap ko BJP phi dei ka bynta jongka sorkar MDA ong u Dy CM

0

Shillong, Jymmang 22 : U Deputy Chief Minister ka jylla uba dei ruh u National Vice President ka NPP u bah Prestone Tynsong u la maham ïa ka BJP ba kam dei ban leh arsap shabar ban kynnoh ïa ka sorkar MDA da ki laiphew jait laiphew skher lyngba ki social media namar ba ka BJP ruh ka dei ka bynta hi jong kane ka sorkar MDA. “ Ngam tip la ki dung tari na dien ne ki mut leh kumno tangba ki pyrshang ban leh da ki buit ba arsap da ka jignthmu ban shu pynthame ïa ki paidbah da ki jingkynnoh ba har rukom ha ki social media, hynrei tang kawei nga kwah ban ong ïa ka BJP ba ki paidbah ka jylla ki dei kiba stad bad wat pynbieit ïa ki namar kim dei kiba bieit satia”. ong u bah Prestone.
U la ther tyngeh ïa ka BJP namar ha kine ki khyndiat sngi ki briew ka BJP ki pyrshang ban pynmih ïa ki video kiba long pyrshah sorkar MDA ba la ïalam da u myntri rangbah u Conrad K Sangma.
U la ong, ka BJP lem bad ka UDP, PDF, HSPDP, NCP bad Independent ki dei ki bynta jongka sorkar MDA. “ Ngin la poi shaba kut artat ka samoi san snem, bad lada ha ka por election kine ki paralok ki kren pyrshah sorkar ne kynnoh kawei ïa kawei ka party ai ki paidbah kin bishar bad rai” ong u Dy Chief Minister.
U la ong ruh ba kine ki jingpyrshang jongka BJP ban kynnoh laiphewjait ka long ban shim kabu namar ba la jan ka election. “ Lada ki don kano kano ka jingeh ne shem ne lap ei ei ka Coordination Committee jongka MDA ka don bad ki dei ban rah ha kata ka Committee ban ïakren sani bha.
“ Kumta ka BJP ka dei ban tyngkan ïa kine ki jingkynnoh ba khlem nongrim namar ki nang tang ban kynnoh khlem da lah ban rah ïa ki mat jingiakren ha ka committee bad kine ki jingleh khlem pep kin kyrtoh kylla ïa ka BJP hi. Ngi don kane ka Committee bad ma nga bad u Myntri Rangbah ruh ngi don hangne lada don ei ei ki lah ban wan ban ïakren bad pynpaw namar lada ki leh kumta ngin jin da la kmen eh ym ban shu leit thad khlem nongrim ha ki socialmedia”. ong biang u bah Prestone.
Halor ka rai jongka BJP ban ai ka jingujor bad jingtip sha ka sorkar pdeng halor ka jingpei um ka tnum jongka ISBT ha Mawiong, u bah Tynsong u la ong “ Ngam don ei ei ban ong halor kata hynrei ka BJP ka dei ban wan da ka lynti kaba dei ban rah sha ka jingtip jongka sorkar haba ki lap ïa kino kino ki jingduna. Ka BJP ka rai ban bud dien ïa ki jingpyntreikam ïa ki skhim bad projek ka sorkar pdeng bad ïa kane ruh ngam sngew ei ei bad ki la rai ruh ban ai kaiphod sha ka sorkar pdeng halor kane ruh ngam don ei ei ban ong hynrei tang kawei ka long ba dei ban ïaid da ka lynti kaba dei da kaba ai ïa ki jinglap jingshem sha ka sorkar jylla ruh keiñ”.
Ha kaba iadei bad ka Meghalaya Community Participation and Public Services Social Audit Act 2017 u la ong ba kane ka aiñ ka treikam hi kumba dei ban treikam.

Leave A Reply

Your email address will not be published.