Ha u Nailur buh thong ka tnad Civil Defence & Home Guard ban thung kam kumba 400 ngut ki samla

Shillong,Naitung 31 : U Myntri ka Civil Defence and Homeguard ka Sorkar Jylla, Bah Comingone Ymbon ha ka sngi Balang u la ïathuh ba la kumno kumno naduh u bnai ban wan ki lah ban sdang noh ïa ka jingpynrung kam ha ka tnad Home Guard.
“Ka jingpynkhreh na bynta ka jingpynrung kam ïa ki Home Guard ka la dep bad nga tharai ha u bnai Nailur ngi lah ban sdang noh ïa ka kam la ka long nadu ka jingbishar ïa ka jinglong ka met ka phad jong ki (physical test) bad hadien kane ngin sa bteng pat sa ka written test,” ong u Myntri haba kren bad ki lad pathai khubor.
“Nga kyrmen ba ha une u snem ngi la lah ban pyndep lut ïa ki kam baroh,” u la bynrap biang.
Katkum ka jingïathuh da u Myntri, ki don baroh kumba 400 tam tylli ki kam ba lait ha ki kyrdan bapher bapher la ka long naduh ka kyrdan SI haduh ki langrut.
Ha kajuh ka por u Myntri u la ïathuh ruh ba haduh mynta ym don shuh ka jingsiew kaba sahteng sha ki nongtrei Home Guard. U ong ruh ba kitei ki Home Guard ba shu trei kumto ba ju tip kum ki volunteer home guard hadien ba ki la dep ïa ka training na ka liang ka tnad pulit kum ki traffic police ki pan naka home guard la kumno kumno 100 ngut ei ei ban ïarap.
“Kumta ngi phah ïa ki bad ïa ka pisa ka dei beit na ka tnad pulit hi bad kam dei satia na ka home guard department,” u la bynrap biang.
U Myntri u la pynshai ruh ba ki volunteer home guard ki dei kiba shu trei shipor bad ki ïapher na kiba thung kam pura. U ong ruh ba lada ka tnad pulit ki ong ym donkam shuh ïa ki, kumta ki hap ban weng noh ïa ki.
Tangba u la ong pat ba na bynta kane ka jingthung kam thymmai ïa ki home-guard ki mang pat 10 persen na ka bynta ki home guard volunteer katba kiwei pat ki hap ban ïakhun beit da ka lynti kaba khuid kaba suba.