Ha u Jylliew yn leit jngoh u Conrad bad Himata ïa ka khappud West Jaiñtia bad Karbi Anglong

Shillong, Jymmang, 24: Ka jingïakren pynbeit pud hapdeng ka Meghalaya bad Assam ha ka wat kaba ar ka la sdang ha ka sngi Balang hapdeng ka Sorkar Meghalaya bad ka Sorkar Assam ha State Guest House, Koinadhara, Guwahati, Assam.
Ki hynriew tylli ki jaka kiba dang don hapdeng ka jingïakajia pud ban ïa pynbeit ha ka wat kaba ar ki kynthup ïa ka Langpih, Borduar, Nongwah-Mawtamur, Desh Doomreah, Block 1 & Block II bad ka Psiar-Khanduli.
Haba kren sha ki lad pathai khubor hadien ba la wai ka jingïalang ba nyngkong eh jong ki Myntri Rangbah ka Meghalaya bad Assam ban ïakren pynbeit pud na ka bynta ki hynriew tylli ki jaka kiba don hapdeng ka jingïakajia pud, u Himanta Biswa Sarma u la ong, “naduh mynta ki Regional Committee jong ki ar tylli ki jylla kin sa sdang noh ban leit sorjamin sha ki jaka ba don ka jingïakajia pud. Ha u bnai Jylliew, baroh arngut ki Myntri Rangbah kin sa leit jngoh ïa ka ka khappud jong ka Karbi Anglong bad ïa ka West Jaiñtia Hills kaba don mynta hapdeng ka jingïakynad khnang ban pynshai sha ki paidbah ba kin im hapdeng ka shongsuk shongsaiñ.”
“Ki paidbah na ki ar tylli ki jaka kin don hapdeng ka jingsngew skhem bad yn sa kular hakhmat jong ki ba ki ar tylli ki jylla kin sa ïapynbeit noh ïa ki jingsngew ïapher, ïa ki jingïakajia, khnang ban tei ïa ka mynsiem kum shiparalok hapdeng ki paidbah kiba sah ha Meghalaya bad ha Assam,” u la ong.
U la pynpaw ka jingkyrmen ba ka jingpynbeit noh ïa ki jaka ba don ka jingïakajia pud kan long lyngba ki jingïasyllok, bad ka jingshahniah.
U la pyntip ruh ba ki Regional Committee kin hap ban phah ïa ka kaiphod ha kaba kut jong u bnai Naitung shwa ban pynlong biang ïa ka jingïalang bishar bniah ha ka kyrdan jong ki arngut ki Myntri Rangbah.
U Myntri Rangbah ka Jylla Meghalaya u Conrad K. Sangma u la ong ba kane ka dei ka lynti jong ka jingsdang ban wad ïa ki lad ki lynti na ka bynta ki hynriew tylli ki jaka kiba dang sahkut hapdeng ka jingïakajia pud.
“Ngi la bthah ïa ki Regional Committee ba kin wad ïa ki jingshisha bad ban sdang noh mardor ïa ka kam kumba la leh ha ka wat kaba nyngkong jong ka jingïakren. Ngin sa ïashong lang ban ïasyllok bad ki kynhun bapher bapher bad ngi kyrmen ruh ban ïoh kam kloi ïa ki kaiphod,” u la ong.
U la ïai ban biang ba ki arngut ki Myntri Rangbah kin sa leit jngoh ïa ka West Jaiñtia Hills bad ïa ka Karbi Anglong kaba dang don mynta hapdeng ka jingbym shongsuk bad ban kyrpad ïa ki paidbah ban pynneh ïa ka shongsuk shongsaiñ bad ban ai ruh ïa ka jingkular sha ki paidbah ba ki lad ki lynti kiba bha eh shen kin sa wan.
“Nga don ka jingsngew skhem ba hapoh ka jingïalam jong u Myntri Rangbah ka Jylla Assam bad ka Sorkar India, ngin sa wad ïa ka lynti ban weng ïa ka jingeh da ka jingshahniah bad ka jingïadei paralok,” u la ong bad bynrap, “ha kajuh ka por ngin sa kyntu ïa ka tnat Survey of India ba kan ïai bteng ban leh ïa ka jingsorjamin ha ki hynriew tylli ki jaka ba ladep ïapynbeit pud ha ka wat kaba nyngkong bad ban pyndep noh mardor ïa ki jingsorjamin.”
Ha ka 11 tarik mynta u bnai ka jingïakynad ka la kyan hapdeng ki Pnar bad ki Karbi kiba sah ha khappud ka Meghalaya bad Assam ha ka shnong Khanduli, West Jaiñtia Hills.
Ha ka 22 tarik, Naiwieng, 2022 , hynriew ngut ki briew (san ngut na ka shnong Mukroh bad uwei u pulit pahara khlaw ka Assam) ki la duhei ïa la ka jingim ha ka jingsynreit kuli jong ki Pulit Assam ha ka shnong Mukroh, West Jaiñtia Hills District.
Ha ka shnong Langpih, ka jingïashrut hapdeng ki Khasi bad ki Nepali ka dang ïai bteng haduh mynta mynne.