U Conrad u kulmar jingmut halor ka Reservation Policy, ngi te ngi skhem ha ka nongrim : Ardent

Shillong, Jymmang 24: U MLA ka Nongkrem uba dei ruh u President ka Voice of the People Party (VPP) u Bah Ardent Miller Basaïawmoit ha ka sngi Balang u la ong ba ba u Myntri Rangbah ka jylla u Conrad K Sangma u dei uba kulmar jingmut halor ka Reservation Policy ym ka VPP.
Haba pynphai nia ïa ka jingong u Conrad ba ka VPP ka dei ban ïit bniah ïa ka nongrim ba ka shim halor ka Reservation Policy, u Bah Ardent u la ong, “Ngim dei kum u Myntri Rangbah uba kulmar jingmut (confused) halor kane ka mat ngi ngi la sngewthuh shai naduh ka sngi kaba nyngkong bad ngim donkam ban dang ïit bniah kumba u phah u CM”.
“Dei ba u kulmar jingmut u Myntri Rangbah lada phi peit u kren khlieh khlieh tdong tdong, phin shim nuksa ha kaba ïadei bad ka Roster mynba ngi dawa ba dei ban pynsahngeh ïa ka jingthungkam u kren pyrshah beit ba ka sorkar kan ym pynsahngeh bad ha kaba ïadei bad ka jingdawa ba ym dei ban pyntreikam ïa ka Roster shaduh u 1972 u Myntri Rangbah u ong ba un ïaid beit kumba la wanrah da kaba ong ba ngin leit sha kashari bad ynda mynta pat kumno phi ïohi, la pynsahngeh shuwa ïa ka jingthungkam thungjam kumba ngi dawa bad kane ka pyni shai kdar ba dei ma u ba kulmar klieh uba hap ban peit bniah ha kano ka nongrim u ïeng,” u la bynrap.
Haba ïadei bad ka jingong u symbud Myntri Rangbah ka jylla u Bah Prestone tynsong ba ka sorkar ka skhem ha ka nongrim ba kan ym ïakren eiei halor ka jingdawa pynkylla ïa ka Reservation Policy u Bah Ardent u la ong ba na ka liang ka party ka kyrmen ba ka sorkar kan hap ban sngap ïa ka jingdawa hjong kiba bun ba lang wat la ki pyneh sa katno katno ruh.
“Ngi kyrmen ba ka sorkar kan hap ban sngap ïa ka jingdawa jong ngi wat la ka pynei katno katno ruh ynda ka la ïohi ïa ka jingkyrshan u paidbah ïa kane ka jingïakhih jong ngi,” u la ong.
“Jin lada ka sorkar kan sngap ïa ka jingai jingmut jong ngi naduh kaba sdang kane ka jingïakhih jong ngin kan ym jia hynrei dei ka sorkar kaba pynbor ïa ngi,” u la ong.
Haba ïadei bad ka jingong ka seng bhalang na Rilum Garo ka ACHIK ba ka VPP lada ka kwah ban pynkylla ïa kane ka polisi bhah kam ka dei ban leit beit sha kashari u Bah Ardent u la pynphai ktien, “Ka VPP kam donkam ban shah hikai ha mano mano ruh ïa ka nongrim kaba ka ïeng bad ïa ki mat kiba ka ïakhun ,” u la ong.
“Ngi kwah ba kane ka jingdawa jong ngi ban weng ïa ki jingeh yn weng lyngba ki lad ki lynti ka synshar khadar (political solution) bad lada ki thud ïa kaba ngi dawa ruh ki lah ban leit sha kashari kumba ki dang shu dep dang shen,” u la bynrap.
Ha kane ka jingïakhih la ïohi ba la wan synrang lang da ki MLA ka party, ki longkmie ki long kpa bad ki samla bad la ïohi ruh ba wat ki samla pule na ka jaidbynriew Mizo ki la wan ban shong kyllaiñ myngngor lang ha ka jaka shah thngan u Bah Ardent ha Parkinglot jong ka Additional Secretariat.
Lah ban kdew ba ka jingshah thngan u Bah Ardent ka la jam sha ka sngi kaba ar kaba u la sdang shong shah thngan naduh hynnin ka sngi Ba-ar.