Shillong, Jymmang 24 : Ka Seng Hynniewtrep National Liberation Council (HNLC) ka pynpaw ka jingbym hun ïa ka kaiphod tohkit halor ka jingshah siat iap u General Secretary barim jongka u bah Cherishterfield Thangkhiew.
“Ka HNLC kam sngewhun halor ka jinglap jong ka jingtohkit” ong u bah Sadon K Blah uba dei u ksiang jongka seng HNLC ha ka miej jingkren ïasuk.
U bah Sadon uba dei ruh u President ka HNYF u la ïathuh ïa kane ka mat yn sa rah hakhmat ka jingïakren ïasuk hapdeng ka Sorkar Pdeng, Sorkar Jylla bad ka seng HNLC ka ban sdang ha ka taiew ba nyngkong u Jylliew.
“ Ngin rah ïa kane ka mat ha kane ka jingkren ïasuk khnang ban sngewthuh shai kaei ka daw kaba la poi shaduh u pud ban shah siat iap u nongïalam ba rim ka seng u bah Cherishterfield Thawkhiew” ong u bah Sadon.
Shuh shuh u la ong “ Kaei ka nogrim ba ka seng HNLC ka ïeng, hooid ka mynjur ba u bah Cherishterfiled u la dei u riewkhraw ne u martyr jongka seng hynrei nalor jongu ki dang don bun kiwei ruh kiba la pha ïa ka jingim na ka bynta ka jaidbynriew”.
U la ong ba ka Seng haduh mynta mynne ka burom bad ïai burom ïa une u nongïalam ba rim jongka. “ Lada kam pynpaw jingpyrshah ne kren ei ei halor ka jingkhlad noh une u martyr jongka ha ki snem ba la dep, hynrei ka HNLC ka shim khia ïa kane ka kam tangba kan ym klet ïa kiwei ki dkhot jongka kiba dei ki martyr kiba la iap ha ka juh ka rukom kumba ka la jia ïa u bah Cherishterfield Thangkhiew” ong biang u bah Sadon.
Ha ka 10 tarik Iaiong u Symbud Myntri Rangbah uba dei peit ïa ka kam pohïing ka jylla u bah Prestone Tynsong u la ong ba ka sorkar kan sa leh ei ei hadien ba ka la dep bishar bniah ïa ka kaipod ba la ai da ka Tactical Team-I kaba dei ka kynhun kaba leit khynra ïa ka ïing jong u bah Cherishterfield ha ka step 13 tarik Nailar 2021.
ïa kane ka jingpan jingpynshai na kane ka kynhun la leh da ka sorkar hadien ba ka la ïoh pdiang ia ka kaiphod jingtohkit na u Justice T Vaiphei bad wanrah ruh ïa ka hapoh ka ïing Dorbar Thawaiñ ka jylla ha u snem ba la dep.
Ka kaiphod ka kdew ba ka jingpynkhreh ïa ka jingleit khynra ka long kaba la biang bha hynrei ka rukom pyntreikam da ka kynhun ba leit khynra ka sniew palat namar ka jingthmu ka long beit ban kem im ïa u.
U Justice T Vaiphei ha ka kaiphod jongu u la batai “ Namar kata ka jinglap jong nga ka long ba ka Tactical Team I kaba la leit ban khynra bad kem im ïa u bah Cherishterfield Thangkhiew ha ka step 13 tarik Nailar 2021 ha ka por 3 baje ka long kaba thurmur, kaba khlem da pyrkhat sani bha bad la shu pynbun palat ïa ki bor pahara ruh kaba la wanrah ka jingiap jong u bah Cherishterfield kaba lah ban kiar ha ka jingshisha”.
Ka jingpynkhreh ka long ban leit khynra bad kem im ïa u ym ban siat iap ïa u namar kane ka dei ka rai jongka tactical team ha ka jingïakynduh shwa ban sdang ïa ka jingleit khynra.
“ Ha ka jinglap bad jingshem jong nga, ka jingpynkhreh ka long kaba biang bad paka bha hynrei ka jingpyntreikam ka long kaba sniew palat, kaba la shu leh kyrkieh, thurmur khlem da pyrkhat jngai bha” ong ka kaiphod jong u Justice Vaiphei da kaba ban biang “ Dei na kane ka daw ki khlem lah ban kem im ïa u briew uba ki pulit ha ka jingshisha ki la dei ban ïoh bha shibun ki jingtip lyngba jongu shaphang ki jingthmu bad ki jingpynkhreh ka seng HNLC”.
