Shillong, Risaw 25: Ka Khasi Student Student Union (KSU) Monitoring Cell mynta ka sngi kala kynduh ïa u Chief Secretary (CS) ka Jylla u Bah D P Wahlang ban phah tuklar ha ka ban pynthymmai ïa ka rukom treikam jong ki District Selection Committee (DSC) ban wanrah ïa ka jingkhuid, ka jingshai bad ka jingshaniah ha ka rukom pynlong ïa ka eksam thungkam thungjam.
Ka Monitoring Cell jong ka KSU haka jingialam da u President rangbah u samla Lambokstar Marngar kala buh haduh 15 tylli mat jingdawa lane ki sienjam baka Sorkar ka dei ban shim ban pynthymmai ïaka rukom treikam ha ki District Selection Committee (DSC).
Ha ba kren shaki lad pathai khubor u samla Lambok u la ong, ka KSU kam shym la shong khli kti bad kan ïai dawa naka Sorkar Jylla ban pynthymmai ïa ka rukom treikam hapoh ka Meghalaya Public Service Commission (MPSC) nalor ki DSC.
Ula iathuh baka CEC kala bthah ïa baroh ki shnat treikam ka seng ban kynduh ïa ki Deputy Commissioner (DC) ha man ki District ban ai jingmut ha kaban pynthymmai bad pynbha ïaka rukom treikam jong ki DSC.
“Ngi kwah ba ka rukom thungkam thungjam nadien jingkhang (Back Door) kan kut noh, ka jingïadei bad ki heh ki haiñ kan kut noh. Ngi kwah ba ki briew kiba dei hok ban ïoh ïa ka kam, kin ïoh ïa ka kam” ong u Bah Lambokstar.
U President ka KSU u la kynnoh ba ka don ka jingud naki paidbah ba ka jur palat ka jingthungkam thungjam ïa ki briew ki ba don jingïadei bad ki MLA, MDC ne ki briew Sorkar bad u la bynrap daka ba ong “Ngim ïoh ïa ka sabut pyrshah ïa ki ba shu shah thepkam tuh hynrei katkum ka ktien ka ong wei ba kadon ka khana kadon beit ka jingjia kumba ong, wei ba ka don ka tdem ka ding ruh ka don bad haba ki sla ki hap dei ba beh ka lyer”.
U samla Lambokstar u la ong baka KSU ka la ai jingmut sha u Chief Secretary, ba haba lait ki kam, ka Sorkar kadei ban pynmih da ki jingpynbna (Advertisement) khnang ba ki samla kin ïoh ban thep ïa ki kam bapher bapher.
“Ka seng kan ïai dawa pynthymmai ka rukom treimkam ka MPSC, bad ban pynthikna baka rukom thungkam thungjam wat hapoh ki DSC kadei ban long khuid long suba” u la ong.
Lah ban kdew hangne, ba ka KSU kala aiti ïa kane kajuh ka dorkhas sha baroh ki Deputy Commissioner jong ki District ka Ri-lum Khasi Jaintia ban wanrah ïa ka jingkhuid, ka jingtreikam kaba shai bad ka jingtreikam kaba shaniah jong ki DSC ha ka jingpynïaid ïa ki eksam thungkam thungkam hala ki jong ki District.
Kine ki jingdawa ki kynthup ïa ka jingthung kham bun ia ki Non-Official Vice Chairmen bad Non-Official Member ha ki DSC ki bym don jingïadei bad ki seng saiñ pyrthei, ban pynthikna ba ki nongaplai kam ki dei ban dei ki nong Meghalaya bad ba nang ban kren ïa ka Ktien Khasi-Jaintia, ban pynmih da ka calendar ïa ki sngi ban pynlong ïa ki eksam thungkam, ban pynmih paidbah ïa ki mark ba ïoh da ki kyrtong ba ïakhun eksam, ban ym pynkylla ïa ki roll nombor, ban ai carbon copy ïa ki OMR sheet sha ki kyrtong, ban pyllait ïa ki answer key hadien ka eksam, ban ring video ïa ka eksam bad interview bad ban pyndep ïa ka jingthungkam hapoh ka 6 bnai naduh ka sngi ba pynmih ïa ka jingpynbna laitkam bad kiwei kiwei.
