Shillong, Nohprah 13: U Myntri Rangbah ka Jylla, Conrad K Sangma ha ka sngi Balang u la plie paidbah ïa ka Nongkseh Indoor Stadium ha ryngkat ka jingdonlang u Myntri ka tnad ïalehkai, u Bah Shakliar Warjri, nangta ka Myntri ka Koit ka Khiah, Kong Ampareen Lyngdoh bad ruh u Chief Adviser jong u Myntri Rangbah- Bah Hamlet Dohling nalor ki ophisar, ki nongïalam shnong, ki nongïalam ka Nongkseh Sports Club bad kiwei kiwei.
Haba kren ha kane ka sngi u Myntri Rangbah u la pynpaw ïa ka jingkmen ba tang hadien ar snem shiteng ba ki wan buh mawnongrim ryngkat bad u Bah Hamlet, katei ka indoor stadium ka la dep bad ïoh ban plie paidbah.
“Kam dei eh ïa ngi tang ban shna ïa ki jingtei lane ki stadium hynrei khamtam eh ban peit ba kan don ka lad ka lynti ïa ki samla khnang ba kin ym bakla lynti,” u la ong.
Shuh shuh u ong ruh ba ka kam kaba kham eh ïa ka sorkar kadei ban ïakhun ïa ka jingkyrduh kam bad ruh ïa u drok nalor kiwei ki ishu kiba ïadei bad ki samla khnang ban ïarap ïa ki ba kin ym bakla ka lynti ïaid ha ka jingim.
” Nga kwah ban ïohi ba kane ka jingtei kan ym sepei hynrei ba kin don ki prokram plie lad plie lynti ïa ki samla, ki prokram ba iadei bad ki kam ïalehkai, ki tamasa rwai tem bad ruh ba ka jingpyndonkam kan long kaba shitrhem,” u la bynrap shuh shuh.
Ha kane ka sngi u Myntri Rangbah u la pynbna ruh ban ai 2.1 klur tyngka na ka bynta ban shna pynbha ïa ka madan Nongkseh.
Ha kane ka sngi la ïoh ruh ïa ka jingkren na u Myntri ka tnad ïalehkai Bah Shakliar Warjri, nangta na ka Myntri ka tnad ka Koit ka Khiah bad ruh na u Chief Adviser ka sorkar jylla Bah Hamlet Dohling.
Na ka liang u Myntri u la ïathuh ba ha kine ki bnai ka sorkar ka la ïoh ban ai haduh kumba 25 tylli ki madan artificial kynthup ïa ki bad badminton bad table tennis court ha kylleng ka jylla.
Haba ïadei pat bad ka stadium ha Nongkseh kumjuh na ban pynbha ia ka madan u la iathuh ba la bunsien u Bah Hamlet Dohling kumjuh u Bah Daniel Thangkhiew ki juwan kynduh man ka por ïa u ban buddien.
Na ka liang ka shnong ki la aiti ruh da ka dorkhas ha u Myntri Rangbah na ka bynta bun ki jingdonkam kiba iadei bad ka thaiñ.
Katba u Bah Hamletson ula ong, ba watla ka Mylliem Costituency kadei kaba jan bha bad ka nongbah Shillong hynrei kam don wat tang kawei ka Indoor Stadium ruh bad kane ka jingplie ïa ka Indoor Stadium mynta ka sngi kadei kaba nyngkongeh ha ka Constituency.
U la pynbna ruh ba shen yn sa plie noh ia ka Indoor Stadium ha Lummawbah bad ha Lawsohtun.
U la ong, ba kum u MLA ula trei shitom ban wanrah ïa ki skhim bad project kiba palat ia ka 100 klur bad kane baroh kadei namar ka jingkyrshan jong u Myntri Rangbah ka jylla u Conrad K Sangma.
