Shillong, Nohprah 13: Ka Meghalaya Softball Association [MSA] hynne ka Sngi Balang ka la khylliap pyrda noh ïa ka lympung ïalehkai softball, ïa kaba la tip kum ka “3rd Meghalaya Open Softball Championship 2023” ha kaba ïa ka namlahduh na ki Shynrang la rah da ka Mawsynram- kaba na East Khasi Hills katba na ka liang ki kynthei la rah da ka Jowai- kaba na West Jaiñtia Hill.
ïa kane ka lympung kaba lai sngi, la plie pyrda naduh ka 11 tarik Nohprah ha madan ïalehkai 2nd Ground, Polo, bad la pynhap pyrda noh hynne ka Sngi Balang (13 tarik Nohprah) da u Bah Khroobok Passah-Assistance Director jong ka Sport & Youth Affair ka sorkar jylla kum u kongsan ha ryngkat u Bah Finely Pariat-General Secretary jong ka MSOA kum u symbud kongsan.
Ha kane ka sngi la wan sakhilang ïa ka jingïalehkai da u President ka synjuk MSA, u Dr. Aman War, Bah Denis Shabong (working President ka MSA) lem bad kiwei kiwei.
Kumban shu pynkynmaw, ha kane ka lympung la wan ïashim bynta da ki kynhun na kylleng ki district kiba kynthup ïa ka Dkhiah na East Jaintia Hills District, Nongstoin na West Khasi Hills District, Nongpoh na Ri Bhoi District, Mawsynram na East Khasi Hills District, Jowai na West Jaintia Hills District bad Mawkyrwat na South West Khasi Hills Districtm
(Ri Bhoi). Haba kynthuplang baroh ki nongïalehkai Shynrang bad Kynthei ki la don haduh 156 ngut.
La sdang ïa ka jingïalehkai naduh ka por 9 baje mynstep hapdeng ki kynhun ba ïaknieh kyrdan ba lai, ha kaba ka Dkhiah na East Jaiñtia Hills ka la pynliem ïa ka Mawkyrwat-SWKH ha ka thup ki Kynthei, katba ka Jowai-WJH ka la pynliem ïa ka Nongstoiñ-WKH ban jop kyrdan ba lai na ka thup ki Shynrang.
Ha ka final jong ki Kynthei ïa ka namlahduh la rah da ka Jowai-WJH hadien ba pynliem ïa ka Lyntijam na Ribhoi District. Bad khadduh ki rangïalehkai ka Mawsynram-EKH ka la pynliem ïa ka Dkhiah-EJH ban rah ïa ka namlahduh.
Nalor kine la ïoh ruh ban sam khusnam ‘Best Pitcher’ ha kaba u Krishna Thapa na ka Dkhiah-EJHD u la jop napdeng ki Shynrang katba ka Larishisha Phawa na Jowai-WJHD ka la khur napdeng ki kynthei.
