Kynshi, Nohprah 13: Ka Kynshi Mawphynaiñ, ka la ïoh rah ïa ka nam laduh ha ka Phutbol jong ka 1st Kynshi Pyllun Football League da kaba pylliem ïa ka Kynshi Rashan da ka 3 la 1 Kol ha ka Phainal kaba la pynlong ha Madan jong ka Kynshi Pyllun.
Kane ka dei ka sien nyngkong ba la pynlong ka Football League jong ka Shnong Kynshi Pyllun ha kaba baroh 7 tylli ki Shnong ba hap hapoh ka Kynshi Pyllun ki la ïashim bynta ba la pynlong da ka Kynshi Pyllun Sports Association (KPSA).
Ka Kynshi Mawphynaiñ ka la thep ïa ka kol kaba nyngkongshi kol ha ka kylla step. Hynrei shuwa ban kut ka kylla step, ka Kynshi Rashan, kaba don ha ka Second Division jong ka PDSA, ka la ïoh ban pynïakhaid. Hynrei ha ka kylla miet pat, ka Kynshi Mawphynaiñ ka la ïoh pynkhih jar sa ar sien bad jop artad da 3 kol la 1.
I Kongsan ha kane ka jingïalehkai phainal i long i Kong P. Warjri, iwei na ki longkmie ba treu ha ka imlang sahlang. Ha ka jingkren jong i ha ka jingïalang kaba lyngkot ba la pyniaid da u Bah P. Sohkhlet, President ka KPSA, i Kong Warjri i la pynkynmaw ba ka phutbol mynta ka la dei ka lad kamai ha kaba kiba bun ki samla na kane ka jylla ki la ïalehkai ha ka I League, ISL bad kiwei kiwei. I la kyntu ruh ïa ki nongïalehikai ba kidei ban kiar na ki jingdih ba sniew. La ïoh jingkren ruh na u Bah Aiban Syiemlieh, Chairman ka Kynshi Pyllun Dorbar, u Bah AR Kharsyntiew, Sordar ka Shnong Mawphynaiñ. La ïadon lang ruh ki Sordar na ka Shnong Kynshi Pyllun ki riew rangbah bad ki paidbah kiba la pynshongshhit ïa kane ka jingïakhun phainal.
Na ka liang i Kong Warjri, i la ai sngewbha da ki Jersey sha baroh 7 tylli ki Shnong. Ka Mawphynaiñ kum ka nongjop ka la ïoh da ka Trophy, ka Pisa bad ki Medal bad kumjuh ruh ka Rashan.
