Ha phyllaw ïing u Wickliff Syiem la pyllait ïa ka kot, “Aiu ngin leh ha jingim ba tang shisien?”

Shillong, Lber, 15: Ïa ka kot kaba la thoh da u Bah Daniel Stone Lyngdoh kaba la ai kyrteng, “Aiu ngin leh ha jingim ba tang shisien? la pyllait paidbah ha ka sngi Thohdieng ha phyllaw ing sah jong u Wickliff Syiem u Syiem Khynnah ka Hima Nongstoiñ ha ka shnong Rajai, Bangladesh.
Ha kane ka jingïalang ba la pynïaid da u Romesh Juwel Sohlamar ha ka ktien Lyngngam, la sakhi lang da kiba bun ki Khasi bad kiwei kiwei ki jaidbynriew kiba shong basah ha ka ri Bangladesh kynthup ruh ïa i Meiieid Relimai Sohlamar iba la kynjoh 93 snem ka rta.
U Bah Daniel u la thoh ïa kane ka kot ha ki 48 sngi ha jingïaid lynti jong u ha baroh kawei ka ri India bad ha ki ri kiba marjan bad ka Ri India.
U nongthoh u la ïathuh, “ ïa kane ka kot la thoh da ka sur khot kaba U Blei U la kren ha ka mynsiem jong nga ba dei ban thoh ïa kane ka kot bad khlem ka jingkhot jong U Blei ym lah ban thoh bad ym ban pyndep ïa kane ka kot. U Mynsiem jong U Blei U kren ba dei ban thoh ïa kane ka kot, Aiu ngin leh ha jingim ba tang shisien?”
Bah Daniel u la ïathuh ba ki don 8 tylli ki lynnong ha kane ka kot kaba khot bad wer ban tip aiu kum ki briew ngi dei ban leh haba ngi im tang shisien. “Ngin ym lah ban wan phai arsien ha kane ka sla pyrthei. Ka kot ka ïathuh ba ka don ïa ki jubab kiba ngi dei ban leh,” u la ong.
U nongthoh u la kyrken ba ka jingmih paidbah jong kane ka kot kan leit sha ka bai kot jong ki khynnah ki baduk kiba pule ha ki skul bad ki Kolej.
U Bah Andrew Joel Sohlamar uba dei u Organising Secretary jong ka Bangladesh Indigenous People’s Forum (BIPK) bad u khun ba nyngkong jong u Wickliffe Syiem haba kren kum u kongsan ha ka jingpyllait paidbah ïa kane ka kot u la ong, “kane ka kot ka don ha ka ïa ki saw tylli ki bynta, ba kynthup ïa ka jingieid ïa ka niam ka rukom (Religion), ka jingieid ri (Nationalism), ka jingieid ïa la ka jait ka kynja (Tribe) bad ka mynsiem riewshlur (Patriotism).”
“La ngi don ha ki niam ki bapher bapher hynrei ka niam ka dei ban buh nyngkong ïa U Blei. Watla ngi don ha kino kino ki bynta jong ki Ri ka pyrthei ngi dei ban burom ïa ka Lama jong kata ka Ri kaba ngi don la ngi don ha India, ha Bangladesh, ha England bad ha kino kino ki Ri ngi dei ban burom ïa kata ka Ri kaba ka Lama jong kata ka ri ka kaweh. Ngi dei ban tip ïalade ba ngi dei na kano ka jaidbynriew bad kum ki Khasi kim dei ban klet ïalade ba ki dei ki Khasi bad ki dei ban ieid ïalade bad ki dei kiba ai jait sha ka kmie kaba dei ka kynthei bad u bym ai jaid sha ka Kmie um dei u Khasi. Ki dei ban burom ïa ki riewkhraw ka jaidbynriew Khasi kum u Tirot Sing, u Kiang Nangbah, ka Phan Nonglait bad u Wickliffe Syiem kiba don ïa ka mynsiem ban ïada ïa la ka jaidbynriew ba ka pateng kaba mynta jong ki samla ki dei ban don ïa ka mynsiem riewshlur ba ki dei ban ïada ïa la ka jaidbynriew,” la ong u Bah Andrew.