Yn pdiang ka Lady Keane College ïa ki shynrang ha ka Science bad Professional Course

Shillong, Lber 15: Ka Lady Keane College kaba dei kawei na ki shlem ai jinghikai ïa ki samla pule kynthei ha ka liang ka jingnang jingstad, ka la pynbna paidbah ba naduh mynta u snem 2024 kan sa pdiang ïa ki samla pule shynrang ha ka laiñ Science bad Professional Course.
U Bah W. Khyllep Retd IAS uba dei ruh u President ka Governing Body ka Lady Keane College bad u Dr. Khlur Mukhim uba dei u Principal, haba kren sha ki lad pathai khubor ha ka janmied sngi Thohdieng ha ka ophis treikam ha katei ka jaka pule, ki la ïathuh ba ka college naduh mynta u snem kan pdiang ruh ïa ki samla pule shynrang kiba pule ha ka Science bad ruh ka Professional Course kum ka Tourism, Computer Science, Fashion Designing bad ka Traditional Music.
U Dr Khlur Mukhim u la ong ba katkum ka jingkylla jong ka por ba mynshuwa ki briew ki dang syier biej hynrei ha kane ka juk ba mynta ym tang ki kynthei lane ki shynrang hynrei ka shong katkum ka jinglah khamtam ha ka liang ka jingnang jingstad.
U la ong ruh ba lyngba kane ka sienjam ba ka College ka shim kan long ka jingmyntoi na ka bynta ki samla pule shynrang bad kynthei ba kin don ka mynsiem ïakhun bad ban ïaburom mar kylliang.
Kumba la sngewthuh na ka kyrteng Lady Keane College kaba mut ba kadei tang na ka bynta ki kynthei, hynrei u Dr. Khlur Mukhim haba jubab ïa ka jingkylli u la ong ba kane kam dei shuh kaba dang thymmai, namar mynshuwa ha St Edmunds ym don kynthei hynrei mynta la bun ngut ki samla pule kynthei ruh ki leit ban pule, kumta ki bor pynïaid kim don kano kano ka jingthmu ban pynkylla kyrteng ïa ka Lady Keane College.
Shuh shuh u la ong kaba la pynlong ïa ka College ban ailad ïa ki samla shynrang kadei namar ki duna kiba pule ïa kitei ki laiñ bad kaba long ruh kum ka jingplie lad na ka bynta kito kibym ïoh ban pule ha kiwei pat ki College. Ka College hi kan kham peit bad ailad shuwa ïa kito kiba biang ki percentage la ka long ïa ki shynrang lane ki kynthei.