Shillong, Jymmang 19 : Ka Trinamool Congress ha ka sngi Palei ka la leit ban pynïar ïa ka shnat treikam jong ka sa ha constituency jong u MLA ka NPP ba dei ruh u Myntri sorkar jylla, u James K Sangma kum ka jingpynkhreh na ka bynta ka elekshon MLA kaban sa long shen ha u 2023. Ïa ka Dadenggre Block Committee la thaw ha ka jingdonlang u Convenor jong ka West Garo Hills District, u Richard M Marak, District Co-ordinator u Safford N Sangma bad u Rupa M Marak nalor kiwei kiwei.
Ha kane ka sngi, ka jingïalang ka la jied ruh ïa ki nongkitkam kiba hakhmat ban pyntyllun ïa ka kam nangne shakhmat ba kynthup ïa u Michael Momin kum u Convenor nangta, u Boaz Marak kum u Co-Convenor, nalor lai ngut ki Co-ordinator ba kynthup ïa u Sengman A Sangma, Grikting Aldrin Marak bad u Jarney Marak.
Haba kren ha katei ka jingïalang, na ka liang u Convenor jong ka West Garo Hills u la ong, “Ngi la lah ban kot sha ka thong na ka bynta ban pynkhlaiñ ïa ka distrik, ka constituency bad ka block jong ka Trinamool Congress. Ngin ïai bteng ban trei na ka bynta ban pynpoi lut ïa ka TMC sha ki kyndong kynshrot jong ka Meghalaya.”
Lah ban kdew hangne, ba ka Dadenggre kadei ka block committee kaba ar ban thaw ha ka distrik ryngkat ryngkat bad ka Williamnagar.
