Shillong, Jymmang 19: U Symbud Myntri Rangbah ka Jylla Bah Prestone Tynsong hynne ka sngi palei ula ong ba ki Ophisar kiba dei peit bad ai jingmut ïa ka jingtrei jong ka Inter State Bus Terminus (ISBT) ha Mawlai Mawiong, ki dei ban ïoh ïa ka jingpynshitom.
U Symbud Myntri Rangbah ula kren ïa kane halor ka jingïohi ïa ka jingtrei torti ïa ka ISBT kaba tang hadien khyn diat taiew ba plie, la lap ba bun ki kamra kila orpait bad ka tnum kala jaw um. Kiba bun ki kynhun kila dawa ïa ka Sorkar Jylla ban thung mardor ïa ka jingtohkit ïa kane ka jingtrei bymhok.
Haba kylli la ka Sorkar kan ai jingpynsajia ïa u Contractor ba trei torti ïa ka kam, kaba la buh ruh ha ka jingma ïa ki briew ha ISBT, u Bah Prestone ula ong ba ïa kane ka project la pyntrei da ka PWD (Building) bad ha ka jingmut jingpyrkhat jong u paidbah hi, ka jingkynnoh ka leit sha u Contractor marwei.
Ha ka jingshisha, ka Sorkar ka don ïa ka rukom treikam ha kaba ïa ki Bill la pynkhreh da ki SDO bad ki Junior Engineer (JE) bad ïa ka pisa la pyllait sha ki Contractor halor ka jingshem balka jingpyntrei ïa ka kam ka long kaba ihun, ula pyntip.
“Namar kata, lada don kano kano ka jingbakla, ki Ophisar kiba dei khmih ïa ka project, nga sngew ba ki dei ban shah pynshiton. Kum ki riew paidbah kumno ngin tip ïa ka rukom pyntrei. Ngam dei u stad technical, ta ka daw ngi la buh ïa ki ban peit bad ai jingmut ïa ka kam (ha ISBT)” ong u Bah Prestone.
Halor ka jingshngaiñ, u Symbud Myntri Rangbah ula ong ba tang namar ba ka don ka jingpei um, kam mut pat ba ka jingtei baroh jong ka ISBT ka long ka bym shngaiñ.
“Ka long kaba shngaiñ. Ka jingtei ka long kaba biang hynrei ka jingpei um ka long shaba palat. Ngi la dep bthah ïa ki Engineer ba dei khmih, ïa u SDO bad ki Technical Weong, kiba dei ban peit haduh ba pyndep ïa ka project ba kin leh ïa kat kaba donkam” ula ong.
Halor ki jingdawa ban tohkit ïa kane ka kam, u Bah Prestone ula ong ba ym donkam satia ban ïakren halor ka jing tohkit. “Ngi dei ban ïakren kumno ha kaban pynbha ïa ka lane lada ngi donkam ban maramor lane lada ngi donkam ban tei thymmai pat ïa ka” ula bynrap.
U Bah Prestone ula kular ba ka Sorkar kan sa wad tynrai ïa kaei kaba tynrai bad lada donkam ban pynbeit mardor ruh kan sa leh ïa kaba donkam.
