Ha kiwei ki jylla ki kren ïa ka CMP shuwa ban thaw Sorkar hangne pat markhongpong: Adelbert Nongrum

Shillong, Ïaïong 07: U Bah Adelbert Nongrum u MLA ka Voice of the People Party (VPP), na North Shillong Constituency u la ong ba ha kiwei kiwei ki jylla haba shuwa ban thaw sorkar synrop ki party kiba rai ban don lang ha ka sorkar ki ju ïakren shuwa ïa ki Common Minimum Program (CMP) shuwa ba kin thaw ïa ka sorkar ym kum ha Meghalaya ha kaba ki seng saiñ pyrthei ki dang poi pyrkhat ïa ka CMP jan hadien shibnai ba ka sorkar synrop ka kynjoh.
Haba kren sha ki katto katne ngut ki lad pathai khubor, u Bah Adelbert u la ong ba kum uwei na ki nongmihkhmat bad kum ka seng kaba khlem don bynta lang bad ka sorkar Meghalaya Democratic Alliance(MDA 2.0) u don ban kynthoh ba ha ka jingshisha ha shwa ban thaw ïa ka sorkar synroplang ka dei ban don ïa ka Common Minimum Programme bad kam dei ban don hadien da la ïaid ka jingthaw ïa ka sorkar ban sdang ïakren hynrei ka dei ban don naduh ka sngi kaba nyngkong ba la pynkhreh thaw sorkar.
“Lada phi peit ha Jamu and Kashmir ka jingthaw ïa ka sorkar synrop hapdeng ka BJP bad PDP ka shimpor haduh arbnai ba kin pynkhreh ïa ka CMP, ha Maharastra shuwa ban synrop thaw sorkar hapdeng ka Shiv Sena, NCP bad Congress ki pynkhreh shuwa ïa ka CMP bad dei ynda ki la dep pynkreh ba ki sa rai ban ïatreilang ym kum hangne ha ngi ba ki ïatreilang shuwa bad ynda la jan kynjoh shibnai ba ki la thaw sorkar ki poi kynmaw ïa ka CMP,” ong u Bah Adelbert.
U Bah Adelbert u la ong ba ka jingkren jong ka seng United Democratic Party (UDP) halor ka Common Minimum Programme ka long kumba ki dang shu sngewthuh mynta da la dep ban thaw ïa ka sorkar.
“Ka dei naduh ka sngi kaba sdang hi, ka dei ban don kata hynrei kumba nga ïohi na ka liang ka UDP ka kren shaphang ka Common Minimum Programme, i kumba ki dang shu sngewthuh da la dep ban thaw ïa ka sorkar”, la ong u Bah Adelbert.
U la ong ba um da don eiei ban kren halor kane hynrei un ïeh ïa kata ha ka jingstad ka jong ki paidbah ba kin bishar namar yn nym lah ban ïaleh khun jakai namar ka politiks hi ka dei ban rai ban wanrah ïa ka jingkylla hapoh ka jylla bad ban don ka jingshngaiñ na ka bynta ki trai ri trai muluk.
Lah ban kdew hangne ba ka Common Minimum Program ka dei ka thong ba ki sorkar synrop ki pynkhreh ban pynurlong ha ki san snem kaba kin synshar namar ki party kiba don ha ki sorkar synrop ki pynkhreh la ki jong ki jong ki kular hynrei namar ba ki donkam ïa ka jingkyrshan jong kiwei pat ki party ki ju pynkhreh ïa ka thong jong ka sorkar ne CMP kaba kine ki party kiba don ha ka sorkar ki mynjur ba kin dei ka thong ba ki party bad ka sorar kin pyndep ha ka term synshar jong ki.
Kum ban shu pynkynmaw ha ka sorkar kaba rim kata ka sorkar Meghalaya Democratic Alliance(MDA) ruh ka khlem don satia ka Common Minimum Programme bad ha kane ka sorkar kaba mynta ruh ka Meghalaya Democratic Alliance (MDA 2.0) ka khlem don satia naduh ba la thaw ïa ka.