Kyrpad ka HBDRF ïa u CEO ban pynrung ha ka Electoral Roll ïa ki Khasi, Karbi bad Nepali ka Block-I

Shillong, Ïaïong, 07: Ka Hynñiewtrep Border Dispute Redressal Forum (HBDRF) ha ka sngi Palei ka la aiti da ka dorkhas ha u Chief Electoral Officer (CEO) jong ka Sorkar Jylla u Bah Federick Kharkongor ban dawa ba dei ban pynrung kyrteng ha ka Electoral Roll ïa ki Khasi, ki Karbi bad ki Nepali kiba sah ha ki shnong kiba hap hapoh ka thaiñ Block-I kaba dang don mynta ha ka jingïakajia pud hapdeng ka jylla Meghalaya bad ka jylla Assam.
Ha ka dorkhas ka Forum ka la pyntip ba ki 25 tylli ki shnong ba shong basah da ki Khasi ki long ka Nongjrong, Moorap, Mynriah, Madan myn-i, Mooriap, Syrlong, Laher, Umsalait, Mynju, Bandeiñ, Mooknor, Khyndeliar, Phle-phle, Phlang, Arbon, Lamarang, Deiñler, Thangrong, Moolaiñ, Moobhar (Moojem), Sapiang (Moojem) Chnongthymme, Moopud, Lum Moojem bad Madan Nangkylla.
Ki 16 tylli ki shnong ba la buhai shnong da ki Karbi ki long ka Rtiang Sanphaw, Tadolangso (Stong Lapar) Langkumwei, Langhemphi, Rongpangbong, Umbaso, Kroo arong (Chnongkroo), Chenan cherop, Tahpat, Wanpung, Samatan (Rongkhelan), Umkhyrmi, Mookoilum, Moothade, Tibin bad Inginlangso.
Ki 3 tylli ki shnong ba la buhai shnong da ki Nepali ki long ka Moorawi, ka Khloolaphlang bad Umpawiang.
“La ïohi haduh mynta ba baroh ki shnong kiba hap hapoh ka thaiñ Block-II (Raid Nongtung) ki la shah kynthup ha ka Electoral Roll jong ka Jylla Meghalaya watla ka dei ka thaiñ kaba hap ha ka jingïakajia pud hapdeng ka Assam bad ka Meghalaya. Namarkata, dei ban leh ruh kumjuh ïa ki shnong kiba la kdew kyrteng haneng kiba hap hapoh ka Block-I da kaba pynrung kyrteng ha ka Electoral Roll jong ka Meghalaya,” la ong ka Forum ha ka dorkhas ba la soi da u Chairman u Bah chandame sungoh bad ka General Secretary ka Kong Purity Phawa.
“Kine ki shnong jong ka thaiñ Block-I ki la shah pynduh ïa ki song pynroi kum ka surok, ka bording, ka pule puthi, ka koit ka khiah bad kiwei kiwei na ki ar tylli ki Sorkar kaba long kum ka jingpynkheiñ ïa ka hok longbriew manbriew. Ki MLA scheme bad ki MLA kim ju phaikhmat satia sha ki jingdonkam jong kine ki paidbah namarba kine ki shnong ki don satia ha ka Electoral Roll. Namarkata, da kaba kynthup ïa kine ki shnong ha ka Electoral Roll jong ka Jylla Meghalaya ngi khmihlynti ba kan don ka roi ka par ha kine ki thaiñ,” la bynrap ka Forum.