Shillong, Ïaïong, 07: Lai ngut ki dkhot ka Hynñiewtrep A`chik National Movement (HANM) ki la shah kem ha ki Pulit jong ka East Khasi Hills District hadien ba ki la beh krad ïa ki nongjngohkai pyrthei kiba leit wad iing basa ha Mawdiangdiang ha ka step Lah Sngi U Blei mynta ka taiew ha ka por 9:00 baje mynstep.
U Superintendent of Police ka East Khasi Hills u Bah S. Nongtnger ha u kyrwoh ba la phah sha ki lad pathai khubor u la pyntip ba katto katne ngut ki dkhot jong ka Hynñiewtrep A`chik National Movement (HANM) ki la leit sha ka iingbasa ba la tip kyrteng kum ka Miracle Spring View Guest House kaba don ha Mawdiangdiang bad byrngem ïa ki nongjngohkai pyrthei kiba sah ha kane ka ïingbasa.
Ki nongjngohkai pyrthei ki la wan shang kai na ka bynta ar sngi ha Meghalaya ban leit jngoh ïa ki katto katne ki jaka mane Blei bad ïa ki jaka jngohkai pyrthei, la ïathuh u SP.
“Ki dkhot ka seng ki la byrngem ïa u trai jong ka ïingbasa kat haduh ba ka la pynkyndit katlah katïai bad pynsheptieng ruh wat ïa u trai jong ka ïingbasa bad ïa ki nongjngohkai pyrthei,” la ong u SP.
Ha kaba ïadei bad kane ka jingjia, ki Pulit ki la register case hapoh ka Rynjah Police Station hapoh ka Section 506/342/34 Indian Penal Code (IPC) bad ïa ki lai ngut ki dkhot ka HANM la kem ha ka sngi Palei.
“Ki Pulit jong ka East Khasi Hills District ki la maham ïa kino kino kiba pyrshang ban shim ïa ka aiñ ha la ka kti da kaba pynthut ïa ka jingwan jong ki nongjngohkai pyrthei sha ka jylla,” la ong u heh Pulit ka District.
