Mana ka KHADC ban shim jait na ka kur Khasi khlem da bud ïa ka aiñ Lineage Act

Khang ïa ki nongsynshar ban ïashim bynta ha ka saiñpyrthei

0

Shillong, Ïaïong, 07: Ka Khasi Hills Autonomous District Council (KHADC) ka la mana ïa ki khlieh Nongsynshar Shnong, Hima bad Elaka ba kim dei ban ai syrnot sha kino kino ki nongshong shnong na ka bynta ban pynkylla ïa ka jait Khasi lane ban shim jait na kano kano ka kur Khasi khlem da bud katkum ki kyndon jong ka Section 3 bad Section 12 jong ka Khasi Hills Autonomous District (Khasi Lineage) Act, 1997.
Ha ka jingpynbna ba la pynmih lyngba u Secretary jong ka Khasi Hills Autonomous District Council (KHADC) ha ka 4 tarik mynta u bnai, ka District Council ka la ong, “u Rangbah Shnong, Myntri Shnong, Sordar Shnong, Headman bad Matabor ki dei ban ïa ka Residential Certificate thik tang sha ki jaidbynriew Khasi katkum ba la kdew ha ka Khasi Hills Autonomous District (Khasi Lineage) Act, 1997, Rules.”
“Nalorkata, ym dei ban ai syrnot sha kino kino ki nongshong shnong ban pynkylla ïa ka jait Khasi lane ban shim ïa kano kano ka jait Khasi khlem da bud ïa ki kyndon jong ka Section 3 bad Section12 jong ka Khasi Hills Autonomous District (Khasi Lineage) Act, 1997,” la ong ka jingpynbna.
Ka KHADC ka la bthah ïa baroh ki khlieh nongsynshar shnong, kata, ïa ki Rangbah Shnong, Myntri Shnong, Sordar Shnong, Headman bad Matabor ba ki dei ban da ïoh ïa ka Sanad na ki Syiem kumba la kdew hapoh ka Aiñ, Rul jong ka Hima/Elaka. Kano kano ka jingpynkheiñ ïa ka jingbthah yn kheiñ beaiñ bad yn ym ai jingithuh satia.
“U Rangbah Shnong, Myntri Shnong, Sordar Shnong, Headman bad Matabor, ha ka kyrteng jong ka Sorbar Shnong, ki lah ban ai ïa ka Residential Certificate sha ki nongshong shnong hadien ba la pynshisha ïa ka iing ka sem bad ba dei hok jong kita ki nongshong shnong katkum ki kyndon jong ka Aiñ, Rul jong ka Hima/Elaka,” la bthah shuh shuh ka jingpynbna.
Ka KHADC ka la mang pyrshah ruh ïa ki Rangbah Shnong, Myntri Shnong, Sordar Shnong, Headman bad Matabor ba kim dei ban long ki dkhot lane ban ïa don bynta bad kino kino ki seng saiñpyrthei lane bad kino kino ki kynhun kiba ïashim bynta ha ka jylli jong ka saiñpyrthei lane ban shu ïarap ïa ki kam jong ki seng saiñpyrthei.

Leave A Reply

Your email address will not be published.