Shillong, Iaiong 7 : Ki nongïalam jongka Womens’ Trading Organisation (WTO) West Garo Hills, Tura ki la leit ai da ka dorkhast sha u CEM ka GHADC ha ka Sngi Balang ha kaba ki la dawa ban khang lad ïa ka jingwan rung ki mar beaiñ sha ri lum Garo bad kumjuh ruh ban pynsangeh ïa ka jinglum khajna beaiñ na ki nongkhaïi Garo.
Kat kum ka aiñ ba la pyntreikam da ka GHADC la kren shai ba ym bit ban shah ïa kiwei ki jaidbynriew ban pynïaid ïa ka Wholesale ha ri lum Garo hynrei ka WTO ka la lap ba ka GHADC ka ai licence pynban ïakiwei ki jaidbynriew ban pynïaid wholesale ha ri lum Garo khlem da bud ïa ki kyndon aiñ Section 3 jongka Garo Hills Regulation No of 1958. The Garo Hills District (Trading by Non Tribals Regulation 1957 bad pyrshah ruh ïa ka section 13 jongka Garo Hills District (Trading by Non Tribal) (Fouth Amendment) Regulation Act 1980.
Kine baorh ki jingleh beaiñ ka la ktah ïa ki nongkhaïi Garo bad ka WTO ka dawa ban peitngor ïa ka jingai licence Wholesale ïa kiwei ki jaidbynriew. Kumjuh ruh kane ka ktah ruh ïa kiwei ki jaidbynriew kiba pynpoi tiar bun bah sha ki trai ri Garo kiba pynïaid kum ki Wholesaler ne Retailer.
Ka WTO ka kyrpad ban pyrkhingbha ïa kane bad ban ym ai licence wholesale shuh ïaki bar jylla.Ka WTO ka dawa ruh ban ym pyntreikam ïa ki aiñ ba thymmai ban khanglad ïaki bar jylla ban leh ïaki kam khaïi ha ri lum Garo hynrei ban pyntreikam beit da ki aiñ kiba la don lypa.
