Shillong, Ïaïong, 07: Ka tnad pule puthi jong ka sorkar jylla mynta kala pynkhreh ban thung biang da ki nonghikai kontrak ha ki skul sorkar kiba ym pat don nonghikai haduh mynta.
Katkum ka shithi ba la phah da ka Deputy Director of School Education & Literacy, ka Ruby Z. Das sha ki Sub Divisional School Education Officer bapher bapher jong ka jylla, la ong ba ka sorkar ka thmu ban thung nonghikai kontrak ha ki skul Lower Primary na ka bynta 59 sngi. Halor kane ka bynta na liang ka Deputy Director ka la bthah ïa ki SDSEO ba kin phah ïa ki jingtyrwa jong ki bad ban phah tang ïa ki kyrteng jong kito kiba la pyndep ïa ka MTET bad kan dei beit thik na ka bynta ki post kiba lait.
Lah ban kdew hangne ba dang shen u Myntri ka tnad pule puthi jong ka sorkar jylla u Rakkam Sangma u la ïathuh hapoh ka Ïingdorbar Thawaiñ ba ki don kumba 1,219 tylli ki post kiba thylli ha ki skul sorkar ha kaba 1002 ki dei ha ki skul Lower Primary, 41 tylli ha ki Upper Primary, 125 tylli ha ki Secondary bad 51 tylli pat ha ki kyrdan Higher Secondary. Ha ki skul SSA ki don 420 ki post nonghikai kiba thylli ha kaba 102 tylli ka dei ha ki skul Lower Primary, 292 tylli ha ki skul Upper Primary bad 26 tylli pat jong ki skul secondary,” pyntip u Myntri.
U la ïathuh ba na ka liang ka sorkar ka la phah ïa 1002 ngut ki nonghikai shipor katbga ym pat lah ban pyndap da ki nonghikai ba pura.
U Rakkam u la ïathuh ba ka jingslem ban thung nonghikai ha kitei ki skul ka dei na ka daw ka jingbthah ka High Court ban pyntreikam ïa ka Roster ha ka jingthepkam ha baroh ki tnat sorkar.
“Na ka liang ka tnat ka la ïaid sha khmat ban thungkam ha kine ki skul bad ngi kyrmen ba ha kine ki khyndiat sngi ban wan kan urlong noh,” u la ong.
U Myntri u la pyntip ruh ba ki don 45 tylli ki skul SSA ba dei jong ka Lower Primary kiba ka jingdon khynnah ka dei tang hapoh 10 ngut bad ki don haduh 62 tylli pat ki dei jong ki kyrdan Upper Primary bad u la ïathuh ruh ba ki don katto katne tylli ki skul ba ym don khynnah skul eiei ruh, ïa kane u Myntri u la ïathuh haba jubab ïa ka jingkylli u MLA ka Liang Pyrshah na Mawhati Constituency u Bah Charles Marngar.
Lah ban kdew hangne ruh ba ha ka snem baladep, ka la don ka jingïakhih na ki nonghikai skul kontrak kiba la shah weng kam ha ka sorkar MDA -I, ha kaba ki don kiba la hikai la bun bun snem ruh. Kane ka jingshah weng kam jong ki, ka la pynlong ïa kiba bun ban pynlong ka jingïakhih bad don ruh kiba la thiah miet ha surok. Nangta ki don ruh kiba la aiti syndon ïa ki kot ki sla jong ki sha ka sorkar namar ba kim sngew myntoi shuh haba kim ïoh kam ïoh jam shuh. Na ka liang ka sorkar ruh ka la pyneh beit triang ha katei ka por da kaba kren shai ba kam lah shuh ban thungkam biang ïa ki.
