Ka leh khuid, ka koit ka khiah bad ki kam ïalehkai-ki mawbyrsiew ban kyntiew ïa ka jingim: Banteidor

0

Shillong, Iaiong 06: U Bah Banteidor Lyngdoh, MLA ka Mawkynrew Constituency bad Adviser ka tnad kam rep ka Sorkar Jylla, u la ban jur ba ka jingleh khuid, ka koit ka khiah bad ki kam ïalehkai ki long kum ki lai tylli ki mawbyrsiew ban kyntiew ïa ka jingim briew.
ïa kane u Bah Banteidor u la kren ha ka jingïalang ïalap pynsngewthuh halor kitei ki lai tylli ki bynta ba kongsan ba la khot pynlong da ka Thynroit Village Teachers Welfare Committee myn ha ka taïew ba la dep ha shnong Thynroit.
“Ngi donkam ban sngewthuh bha ba kine lai tylli ki bynta ki dei kiba kongsan khamtam ïa ki khun samla pule kiba long ka lawei ha ka imlang sahlang”, la ong u Bah Banteidor da kaba ai khublei ïa katei ka Committee kaba dei da ka jingïatreilang ki nongshong bad nonghikai lem ki nongïalam shnong.
U la ong ba ki nonghikai lem ki kmie ki kpa kumjuh ki nongïalam ki shnong ki la pyni ïa ka nuksa kumno ban saiñdur ïa ka imlang sahlang kaba khuid, kaba koit kaba khiah bad kaba ki samla hi ki shim ïa ki kam ïalehkai kum ki lad ban pynjanai ïa ka jingim jong ki.
Ha kane ka sngi, u Bah Eugeneson Lyngdoh, nongïalehkai phutbol barim ka Ri India u la ai ki symboh jingpyrkhat ban ai mynsiem ïa ki samla ha ki kam ïalehkai.
“Ka kam ïalehkai ka wanrah ka jinglong ryntih bad ka jingïoh ïa ka met kaba koit kaba shait nalor ka jingleh khuid bad ka jingsumar”, la ong u Bah Eugeneson uba la long teng ruh u MLA na Mawphlang Constituency.
Na ka liang u Bah G Dhar, BDO Mawkynrew Block u la ai ka jingïaroh ïa ka jingïatreilang hapdeng ki nonghikai bad nongshong shnong ban wanrah ïa kum kine ki prokram ki ban ai jingmyntoi ïa ki paidbah.
Halor ka khuid ka suba khamtam ïa ka mei mariang la wan ban ai jingkren da u Bah Melancius Nongrum, Block Coordinator, Swaach Bharat Mission (G) katba halor ka koit ka khiah pat la ai jingpynshai da u Dr AK Nongbri, Dr Incharge ka Jongksha PHC.
Ha kane ka sngi la wan ruh ban ïa donlang da ki khynnah ïalehkai Sports kiba la wanrah nam rah burom ïa ka Jylla na ki lympung ïalehkai bapher bapher kiba la pyni ruh ïa ki rukom ïalehkai jong ki ba kynthup ïa u Babit Kharsahnoh, Pynnehbor Mylliemngap, Jeffrey John Nongdhar, Blaseibok Kharbuli, Emdor Blah, Teibok Marbaniang, Rishotskhem Marboh bad Nehbor Mawthoh.
Nalor ki nongïalam shnong ba kynthup ïa u Bah Harkin Warjri, Sordar, kiwei kiba la ïa donlang ki kynthup ïa u Bah Bankor Kurkalang, Chairman ka Committee, ki nongkitkam, ki khynnah skul lem ki nonghikai na ki skul bapher bapher kane shnong bad kiwei pat kiba la pynlong ka jingpynkhuid ïa ki sawdong sawkun kane ka shnong ha ka por step jong kane sngi.

Leave A Reply

Your email address will not be published.