Ha ki lai jaka buh ka FKJGP ïa ki kynhun ban peitngor ïa ka jingjyllei jong u drok

Mawkyrwat, ‘Naitung 10: Ka Federation of Khasi Jaiñtia & Garo Peoples (FKJGP) jong ka South West Khasi Hills District mynta ka sngi da ka jingsngewkhia bad jingkitkhlieh ïa la ka dong ka thaiñ, ka distrik baroh kawei ka la ïoh ban thaw bad buh ïa ki kynhun ki ban long ki nongpeit, peitngor bad peit pyrman ïa ka jingjyllei jong u drok ha kine ki sngi.
U Balse Kharbani, General Secretary jong ka FKJGP, South West Khasi Hills District haba kren ha ki lad pathai khubor u la ong hadien ka jingïalang ïamir jingmut halor ka jingkynrei jong u drok bad ki la shim kawei ka rai ban pynmih ïa kawei ka kynhun kaba dei ha ka kyrteng jong ka FKJGP hi ban don ha ki lai tylli ki jaka ban long kiba peitngor ïa ka jingkynrei jong une jait jingdih ba pynsniew. “Ki lai tylli ki kynhun ba kum ka seng ka la buh ki long ha ka thaiñ Ranikor – Photkroh, thaiñ Nongjri bad kumjuh ruh ha thaiñ Mawkyrwat”, ong u bah Balse.
Shuh shuh u la ong ruh ba kane ka kynhun kan treikam beit 24×7 katkum ki jingpyntip jong ki paidbah halor ka ïaid ka ïeng jong ki nongkhaiï drok ne da kaba kin long hi ki nongbud-dien ha ki por baroh.
Namarkata, ka seng ka sngewban kyrpad ïa ki paidbah nongshong shnong ba kin ai lem ka kti kamon ka kti kadiang ban rad-dyngkhong ïa ki jingsniew kiba la sdang ban jylliew ha ka dong ka thaiñ baroh kawei.
Ha kawei pat ka liang, ka seng ka kren ruh da kaba shai bad ka pynshlur ba lada don mano mano ba ai jingtip halor ka ïaid ka ïeng jong ki nongkhaiï drok ïa kiba kum kita ki briew ynsa ai khusnam, ïathuh u bah Balse.
Kum ka FKJGP ka ai ruh ka jingkynshan ïa ka KSU jong ka South West Khasi Hills District ba ka la lamkhmat bad ïaid shaphrang ryngkat ki Seng Samla Shnong bad ki rangbah nongshynshar shnong jong ka thaiñ Mawkyrwat ïa kaba ki ki la leit ban ïa kynduh markhmat ïa u Myntri Sorkar ba dei peit ïa ka Social Welfare Department, u bah Paul Lyngdoh halor ka jingjyllei u drok hapoh ka South West Khasi Hills District.