Haba ïakren ïa ka jingkiewdor ki marbam, ka la dei ban pynkynmaw ïa kawei ka jingjia ha kawei ka dukan, kaba la jia la khyndiat snem mynshwa bad kata ka long, ba uwei u khar Assam, ula rung ha kawei ka dukan bad ula kylli, ïa ka dor jong ka sha shi pela bad haba ka nongdie, ka ïathuh ba ka dei shiphew tyngka, kumta ula pan noh tang shiteng pela, hynrei ynda la dep dih, haba u siew tang 5 tyngka, ka nongdie ka la dawa ba u dei ban siew 10 tyngka bad ka daw, ka long ba shane, ym ju kham ïa kren ïa ka sha shiteng ne ka sha shi pela, namar ba lada ka bang la dih lut, lada kam bang la bret noh, katba ka dor la hab ban siew beit, katba ong ki nongdie bad ngim ju kylli hi ruh ïa ka dor jong ki jingbam, ba la bam hapoh dukan, kumba ki kylli ki nongwei.
Ban ïakren ïa ka daw jong ka jingkiewdor ki marbam, ki don bun spah jait ki jingkhleh, kiba la eh than ban ïatih bniah; hynrei ka don tang kawei ka metbah bad kata ka long, ba ki Khasi, dei kiba leh lut phut bad bym salia ïa ka dor jong ka pisa, namar ba lada dei ban ïoh tam sa san ne shiphew tyngka na u nongdie, la sngewhun, lada u nongdie u ai da ki mit mit ruh.
Ym pat lah ban ïa klet ïa ka khlam corona bad la ïa kynmaw bha, ïa ka jingkiewdor ki mar ba kongsan ha katei ka por, naduh ki tiar bam, haduh ka bai kali; hynrei kaba lyngngoh ka long ba kito ki tiar kiba la kiewdor kim hiar shuh satia haduh ha kine ki sngi ruh, hynrei ym don mano mano ba lah ban tuklar ïa katei ka jingshim kabu jong ki nongdie ne ki nongkamai kali.
Don kiba pynsngew ba kane ka mat, ka donkam ban ïakren ha Ïing dorbar jylla; hynrei kane kam da dei eh ka ishu jong ka sorkar bad lada ïakren ha Ïing dorbar, ka long tang ban shu ïakren, hynrei kan nym myntoi eiei satia, namar ba ïa ka jingot kilo ïa u jhur ha Ïewduh, ka ïing dorbar kam lah ban pynduh pyndam, nangta ka jingkiewdor ka bai taksi, naduh ka por corona; ha kaba ka ïing dorbar kam lah ban tian bishar ïa ki draibar; hynrei kaba ka ïing dorbar, ka lah ban tuklar, ka long ïa ka jingslem than, ka jing maramot ïa ka jingkieng Umïam, kaba la dap snem pura bad kaba ailad ïa ki nongñiah trok ba kin kynting dor ïa ka baikit, namar ba ki hap ïaid kyllaiñ shaduh Mawryngkneng, nangta ka jingshaniah ïa ki marbam nadong shadong, ban wan rah na shabar bad katei ka dei sa kawei pat ka daw.
U Conrad Sangma, kum u Myntri Rangbah, u dei ruh u dkhot jong ka GST Committee bad ngim tip, la ula ju kren ne em, ïa ka jingshah khñiot pdot jong ka sorkar India ïa ki nongkhaïi, ïa ki nongrep bad ïa u paidlang ka jylla, lyngba ka khajna GST, ha kaba u nongtrei kam lajong, u dei ban leit shim da ka ram, ban siew ïa katei ka khajna, na bynta ki mar, kiba u leit shalan sha ki tnat sorkar, wat la ki dei kiba um pat ïoh satia ïa ka bai siew. Kam dei tang kata, hynrei ki nongthied marbam, ki shu bret kai ïa ka pisa ha ki mahajon, ha kaba tang na ka bynta u khaw plastik ki hap siew tam 5 percent sha ki mahajon, nangta sa ki jingthied kiba bun kum ki biskit, kum ki juti, ki jaiñ bad bun bah kiwei pat ki tiar ba ki donkam man ka sngi.
Haba shu peit ha kine ki sngi, la ïohi, ba ka tnat Supply jong ka sorkar jylla, ka ïoh thiah bad kata ka long, ba kam ju phah shuh ïa ki dor ki mur ha ïew ha hat bad sha ki kotkhubor, nangta ki nongdie ruh kim ju wah haba ïohi paidbah, ïa ki dor jong ki marbam ba kongsan bad kumta ki nongthied kim tip satia ïa ka dor jong ki mar ha dukan bad ka la dei ïa ka tnat Consumer Affairs, ba kan pynmih ïa ka hukum ban wah paidbah ïa ki dor jong ki mar ba kongsan, kum u khaw, u piat, ka shini, ka umphniang bad nangta sa ka GST, ba ki nongthied kin siew tam, ba kin sngewthuh ïa ka jingpynlut tam jong ki sha ki khajna bapher.
