Ha kajuh ka sngi pyllait song jingïarap u CM sha ki kynhun bapher bapher lyngba ka CMSDF

Shillong, Naitung 23 : U Myntri Rangbah ka Jylla Shri Conrad K Sangma ha ka sngi Palei u la sam ïa ki sanction letter hapoh ka Chief Minister’s Special Development Fund (CMSDF) sha ki kynhun bapher bapher ha ka jingïalang kaba la pynlong ha Ïingsah jong u ha Shillong.
Ïa kane ka jingkyrshan pisa la ai sha ki kynhun treikam bapher bapher kynthup naduh kii shnong ki thaw, ki jaka pule, ki kynhun ïalehkai bad ki Dorbar Shnong ba kin pyntrei ïa ki projek kiba thmu ban pynkhlain ïa ki jingdon ki jingtei ha ki shnong ki thaw bad pynjanai ïa ka jingshakri paidbah ha kylleng ka Jylla.
Napdeng kiba ïoh bynta ki kynthup naduh ka Synjuk Rangbah Shnong Dorbar Raid Mathan, Chibak Agalgittim Sports & Cultural Club, Laitnongrim Upper Primary School, Church of God (M&A), Sohryngkham, Rangthong Cultural Club and Sports Association, Reach Shillong Ministries, Mizo Women Welfare Society, Umpling Presbyterian Secondary School, St. Anthony’s Higher Secondary School, bad ki nongmihkhmat na ki shnong jong ki districts bapher bapher.
Ki kam ba la bei tyngka ki kynthup ïa ka jingtei ïa ki Ïingskul bad ki kamra pynlong klas, ki Ïingdorbar Shnong, ki hall ba lah pyndonkam ia bun ki jait kam, ka jingtei ïa ki Ophis jong ki seng ba don ha Shnong, ka jingpynbiang ïa ki jaka leit bar ha ki skul bad ki ophis paidbah, ki madan ïalehkai basketball, ki jaka saitjain, ki kor um, ka jingshakri ki ambulance, ka jingthied ïa ki tiar ïalehkai, bad kiwei kiwei ki jingtei hapoh ka Shnong ka thaw.
Haba kren ha ka jingïalang, u Myntri Rangbah ula ong ba ka CMSDF ka dang iai bteng ban shakri kum ka atiar ba kongsan na ka bynta ban leh eiei ïa ka jingdonkam kyrkieh ïa ka roi ka par ha ki shnong ki thaw. Ula pynpaw ba kane ka prokram kala pynlah ha kaban ai jingkyrshan ha ka por kaba biang ïa ki project kiba kyntiew ïa ka rukom im jong ki nongshong shnong haba ïaid ryngkat bad ki prokram ba kham heh jong ka Sorkar.
U Conrad ula ban jur ba ka Sorkar ka ïai kut jingmut ban pynthikna ïa ka jingai mar katjuh ïa ka roi ka par ha baroh ki District da kaba kyrshan ïa ki jingdonkam bala ithuh hakhmat eh da ki shnong ki thaw. U la kyntu ïa ki nongïoh bynta bad ki nongpyntrei, ba kin pynthikna ba dei ban pyntreikam bha ïa kine ki project bala mang bad ban pyndep hapoh ka por kaba la buh khnang ba ki shnong ki thaw kin ïoh ïa ka jingmyntoi kaba bun eh.
Ha kane ka jingïalang la wan ïashimbynta da ki nongïoh bynta ïa ka skhim, ki nongmihkhmat paidbah, ki nongïalam shnong bad ki heh Ophisar na ki tnad ba dei khmih.
Ki nongïoh bynta kila pynpaw ïa ka jingsngewnguh ïa ka Sorkar namar ka jingai jingkyrshan ïa ki kam kiba pynkhlain ïa ki bor shnong, kyntiew ïa ka pule dangle bad ki kam ïalehkai, pynbha ïa ki jingtei ba donkam u paidbah bad synniang sha ka roi ka par jong ka Jylla ha baroh ki liang.