Ha kajuh ka sngi plie u CM bad Civil Sub Division bad Block ha Rilum Garo

Tura, Nohprah 01: U Myntri Rangbah, u Conrad Sangma mynta ka sngi,u la plie ïa ka Civil Cub Division ha Dalu bad ïa ka C&RD Block ha Purakhasia. Baroh ar kidei ha Rilum Garo. Shuwa jong kane, ki paidbah jong ka thaiñ Purakhasia ki hap leit sha Dalu C&RD Block kaba la buh ïa ki ha kiba bun ki jingeh.
Haba kren ha ka jingïalang plie Civil Sub Division, u Conrad u la ainam ïa u kpa jong u, u (L) Purno Sangma, da kaba ong ba u Purno u don ka jingïadei kaba jan bad ki paidbah ka Dalu bad kadei ka jingangnud jong u ban wanrah ïa ka roi ka par ha Dalu, namar ba u (Purno) u ju leit skul ha Dalu. “Kane kadei ka jingpynurlong ïa ka jingangnud i Pa jong nga na ka bynta jong phi”, la ong u Conrad.
U la ong ruh ba ka jingplie ïa ki Civil Sub Division bad ki C&RD Block ha kylleng ki jaka jong ka jylla kadei ka jingïaleh ka sorkar ban rah ïa ka jingsynshar khamjan sha ki paidbah.
Ha kane kajuh ka sngi, u Conrad u la plie ruh ïa ka C&RD Block ha Purakhasia kaba dei ha South West Garo Hills District. Ka headquarter jong kane ka Block kadei ha Chongnapara. U Myntri Rangbah, u la ong ba wat lada ka Meghalaya kadei ka jylla kaba rit, hynrei ka don palat hynriew hajar tylli ki Shnong kaba la buh jingeh shibun ïa ka sorkar ban treikam bad khamtam eh ban pynpoi ïa ki kam pynroi sha ki shnong ki thaw.
Ha kane kajuh ka sngi, u Myntri Rangbah u la plie ruh ïa ka head office jong ka Prime Hub jong ka All Garo Hills Multipurpose Cooperative Society (AGHMCS) Ltd. ha Babadam kaba hap ha ka Rongram C&RD Block.