Shillong, Nohprah, 01: U Nongïalam ka Liang Pyrshah u Mukul Sangma uba long ruh u Myntri Rangbah barim jong ka Jylla ha ka sngi Palei u la dawa ïa ka Sorkar Sorkar Meghalaya Democratic Alliance (MDA) ba ïalam da ka National Peoples’ Party (NPP) ban register case pyrshah ïa u Chief Executive Member (CEM) jong ka Karbi Anglong Autonomous Council (KAAC) u Tuliram Ronghang halor ka jingkynnoh ba ki Khasi-Pnar kiba shong basah ha ka shnong Mukroh ki dei tang ki poiwir kiba sah be-aiñ.
Ha ka jingïakren bad ki lad pathai khubor, u Sangma u la ong ba u CEM ka KAAC u la pyrshang ban tynruh ïa ki tyllaw ding ha ka ding kaba la rhem lypa na ka jingshah siat ïap jong ki hynriew ngut ki briew, ba kynthup ïa san ngut ki Khasi-Pnar bad uwei u nongap pahara khlaw ka Assam,ha ka jingsynreit kuli jong ki Pulit Assam ha ka shnong Mukro, West Jaiñtia Hills District ha ka step jong ka 22 tarik, Naiwieng, 2022.
Une u Myntri Rangbah barim jong ka Jylla u la ong ba ka jingjia ba sngewsih kaba lam sha ka jingshah pynïap beiñ jong ki mynsiem baluilui ha ka shnong Mukroh ka dei tang na ka daw ba ki bor sorkar kim shym la shimkhia ïa ka jingeh jong kane ka shnong kaba la shah kyntur pud ha ka Assam.
“Namarkata, ki paidbah jong ka Jylla Assam bad ka Jylla Meghalaya ki dei ban tip ba kine ki jingjia ki wan jia na ka daw ba ka Sorkar Meghalaya bad ka Assam kim shym la shimkhia ïa ki jingshah thombor, ki jingshah leh tohmet jong ki nongshong shnong kiba sah ha ki shnong khappud,” u la ong.
“Mynta, haba phi la pyrshang ban tem ïa ka ding kaba klang namar ka jingdawa jong ki paidbah, phin ïohi pynban ba u briew uba la shah pynkup bor katkum ka riti synshar jong ka ri u la nang kynton dieng ïap shuh shuh ïa ka ding kaba la klang,” la kynthoh u Sangma.
U Sangma u la dawa ïa ka Sorkar Meghalaya ba ka dei ban register case mardor ïa u CEM ka KAAC halor ka jingkren ïa ki kyntien kynshoit kaba wanrah ïa ka jingsngew ïapher jaidbynriew.
“Ka dei ka jingpynshit, ka dei ka jingkynsoit da ki briew kiba la shah pynkup bor, bad ka dei kaba la nang pynshlur shuh shuh ïa ki riewbat aiñ jong ki ban leh ïa ki kam pyntriem. Namarkata, ka Sorkar Meghalaya ka dei ban register case halor ka jingpynshit ïa ki kam be-aiñ. Kine ki jingjia ki dei kiba lah ban tem noh mardor hynrei na ka jingkren khlem jingkitkhlieh ka la nang pynmeh ding shuh shuh,” u la ong.
