Jowai, Nohprah 01: Uno uno ne kano kano ka ne u briew kiba shong kulai da u Khla, ki kwah ban pyni katno ki long kiba shlur bad ban pyntieng ïa kiwei ba kin dem ha khmat jong ki, hynrei ka long pat ka long kaba eh ban the lakam ïa u Khla bad ban pynphai kat shaba mon.
U Tuliram Ronghang, Chief Executive Member ka Karbi-Anglong Autonomous Council( KAAC) bad ki nongbud jong u ha ka jingwan jong ki sha Mukroh ki la wan da kaba shong kulai ha u Khla bad ban pyntieng ïa ki Khasi-Pnar bad ïa ki nongshong shnong jong ka Mukroh ba katno ki long kiba shlur bad ban pyntieng ïa ki nongshong shnong jong ka Mukroh ba kin dem ha khmat jong ki, hynrei kin pyrkhat ba une u Khla uba ki shong kim lah ban teh Lakam bad pynphai ia u kat shaba ki mon.
Shuh shuh u Luliram Ronghang( CEM -KAAC) u ong ba ki Pnar kiba shong basah ha Block I bad kum juh ïa ki nongshong shnong jong ka Mukroh ba ki dei ki poi wir kiba shu wan shong ha kane ka thain, hynrei u Luliram Ronghang um tip pat ba ki Nong Jaiñtia (Khasi-Pnar) kiba shong basah ha Elaka Labang-Nongphyllut,Nongphyllut Dolloiship, Pangam Raliang, Elaka Dolloi Raliang bad ki Nongshong shnong jong ka Mukroh, Elaka Shilliangmyntang, ki tip ia ki Mikir kiba shu khot mynta kum ki Karbi, nangno ki wan shong, naduh mynno ki wan shong hapoh ki pud ki sam jong kine ki Elaka bad naduh mynno ki ïoh ïa ka District Mikir (Karbi-Anglong ba mynta). U Tuliram Ronghang u la dei ban kylli shwa halade ba ha shwa ba ki Mikir (Karbi) kin wan shong ha kane ka thaiñ ïa kaba ki briew ki kham ïatip kum ka Block I, kane ka thaiñ (Block I) ka dei ka jong no?.
Ia ka thain kaba ki briew ki kham ïatip kum ka “BLOCK I” la pynlong da shi bynta u Dolloi Nongjngi, Dolloi Shiliang Myntang, Dolloi Raliang bad u Dolloi Labang-Nongphyllut bad kiba dei ki bynta jong ka Rilum Jaiñtia naduh hyndai hynthai. U Tuliram Ronghang bad ki lok Karbi kiba shong basah ha Block-I, ha shwa ba yn kynthoh ba ki Khasi-ki Pnar bad ki nongshong shnong jong ka Mukroh ki dei ki briew kiba shu wan poiwir bad shong ha kane ka thaiñ, ko Tuliram Ronghang bad phi ki lok Karbi kiba shong basah ha Block-I, kylli shwa ïalade nangno phi wan bad wan shong ha kine ki Elaka Dolloi jong ka Rilum Jaiñtia.
U Tuliram Ronghang bad ka kynhun jong u, ki la wan jngoh ïa ka shnong Mukroh da kaba shong kulai ha u Khla ban pyni katno ki long kiba shlur bad ban pyntieng ïa ki Khasi- ki Pnar kiba don ha kane ka thaiñ ba kin dem hapoh jong ki. Ki Khasi- ki Pnar (Jaiñtia) naduh hyndai hynthai ki long ki briew kiba “KOMTI-NEI” ki don ki Nongsiat Khla, kiba la nud wat ban ïaleh pyrshah ïa ki bor jong ka Great Britain (England) ïa kaba la tip kum ka Jaiñtia-Anglo War.
U Tuliram Ronghang, Chief Executive Member jong ka Karbi_Anglong Autonomous Council, ula ai ding ha u ‘langïap bad kane ka ding ym lah tip shano kan pur?. Lada kane ka ding kan pur u Tuliram Ronghang CEM, ka KAAC u hap ban kitkhlieh bad pynsniewdur ïa ka jingïadei paralok hapdeng ki Karbi- bad ki Khasi-ki Pnar (Jaiñtia). U Tuliram Ronghang ula dei ban pan map shisyndon ïa kane ka jingkynthoh jong u ba ki Pnar ki dei ki poiwir kiba shu wan shong ha Mukroh bad ha ka thaiñ Block-I.
