Shillong, Nohprah 01: Ka Social Organizations of Meghalaya against Land Alienation (SOMALA) ka la ong ba ka jingshah pynïap ban ka jingïaumsnam kaba ju jia a ka por sha ka por ka daw hi ka dei namar ka jingbym pyntreikam ka sorkar ïa ka Meghalaya Transfer of Land Regulation Act, 1971 kaba khang sbak ïa ka jingthied bad long trai ïa ka khyndew ka shyiap da ki bym dei ki riewlum jong kane ka jylla.
Ha ka kyrwoh sha ki lad pathai khubor u Convener ka SOMALA u Bah W Anthony u la ong ba ka jingbym pyntrei ïa kane ka aiñ lada tih tynrai ki daw jong ka jingkulmar lada dei kaba ha Mukroh ne ha Langpih.
“Ki Sorkar ka Meghalaya ki la leh klet ïa ka Ri bad ka jait bynriew ki lah leh klet ban pahara ïa u pud u sam ka jylla ha ki bun ki jaka kum ha Langpih, Mukroh ka ba la don ruh ka jing ïap briew bad jing umsnam. Ka daw tynrai ba kine kiei kiei ki jia ka long namar ba ka Sorkar kam shym pyntrei kam ïa ka Meghalaya Transfer of Land Regulation Act, 1971 mynta la 40 snem hynrei ka Sorkar Meghalaya ka la kloi ban pynkylla (amend) ïa katei ka Land Transer Act ba la kdew ha neng ban ai lad ïa ki company ban thied jaka ban tih mawshun ban shna karkhana pynmih dewbilat bad kiwei kiwei ki jait karkhana,” ong ka kyrwoh.
Shuh shuh u la ong ba ka jingpynkylla ïa ka Land Transfer Act 1971 sha ka aiñ ba la khot ka Meghalaya Transfer of Land Regulation Act, 2010 ka ailad ïa u bym dei riewlum na kanew ka jylla ban hiar pateng ïa ka khyndew ka shyiap.
“Ka Sorkar ka la pynkylla ïa ka Land Transfer Act sha ka aiñ ba la khot ka Meghalaya Transfer of Land Regulation Act, 2010. Ïa kane ka aiñ 2010 la shna na ka bynta ki nongïoh pateng ïa ka khyndew ka shyiap jong u bym dei riewlum ha Meghalaya. Kane ka aiñ ka ktah mat iong ïa ka jait bynriew namar ka pynduh ïa ka section 3 (1) jong ka Land Transfer Act, kaba khanglad ïa u bym dei riewlum ban thied jaka ha Meghalaya, ka ba mut ba u nong ïoh pateng ïa ka khyndew ka shyiap jong u bym dei riewlum u lait noh na ka jingteh ne jingkhanglad ka section 3 (1) jong ka Meghalaya Transfer of Land Regulation Act, 1971. Kane ka aiñ 2010 ka pynkylla riewlum ïa u riewthor ban ïoh bynta lem kum ma ngi na ka bhah jong ngi” u la ong.
Shuh shuh u la khot la wer ïa ki paidbah ba kin pynbor ïa ka sorkar ba kan pyntreikam ïa kane ka aiñ ba kan long ka stieh ïada na ka jinglong rit paid ha la ka bri.
“Mynta ka la dei ka por ban ïa snoh kti lang baroh ki rangbah rangsan, kynthei shynrang, samla samhoi, seng saiñ pyrthei, seng bhalang ban pynbor ïa ka Sorkar bad ki MLA ruh ban pyntrei kam ïa ka Meghalaya Transfer of Land Regulation Act, 1971 bad ban pynbna kyrkieh (notify) ïa ka competent authority kaba long ka bor ban mynjur ne kyrngah ïa ka jingthied jaka ki bym dei riewlum ha Meghalaya ïa ka ba ka Sorkar kam shym la leh ei ei mynta la 40 snem. Ka jingshisha ka long kan jia aiu ïa ki jaka ba lathied khlem ka jingmynjur jong ka competent authority,” bad bynrap “Ngi khmih lynti ba ki kyrtong ki ban ïaleh election ha u snem 2023 kin kular ïa kawei ban wan rah ïa ka jingpyntrei kam ïa ka Meghalaya Transfer of Land Regulation Act, 1971 khnang ban ïada ïa khyndew ka shyiap bad ïa u pud u sam,” pynkut ka kyrwoh a u Bah W Anthony.
