Ha ka sngikha u President, plie ka HANM ïa ka ophis treikam ha New Shilllong

0

Shilllong, Nailur 26: Ka Hynñiewtrep Achik National Movement (HANM) Seng Kmie mynta ka sngi Ba ar ka 26 tarik Nailur 2023 ka la plie paidbah ïa ka ophis treikam ba thymmai jong ka seng ha Mawkasiang, New Shillong.
Kane ka sngi plie ïa ka ophis ka dei ruh ka sngikha ba 48 snem jong u President ba Rangbah jong ka seng u Bah Lamphrang Kharbani bad ruh ka jingdap 15 snem ka jingïaid lynti jong ka seng kaba la mih pyrthei ha ka 26 tarik Nailur 2008 ban shakri ïa ka ri bad ka Jaidbynriew.
Ia kane ka ophis treikam la plie da u Myntri K Langstieh Myntri ka Hima Mylliem ha ryngkat ka jingdonlang u Myntri M Kharlukhi, ki President bad Vice President jong ka seng na ki District, ki Circle bad ki Unit bapher bapher.
Ha kane kajuh ka sngi la ïoh ruh ban pyllait paidbah ia ka kali kit nongpang kaban ai jingshakri ïa ki paidbah khamtam kiba duk ba suk ha ka pang ka shitom.
La ïoh ruh ban pyntian smai ïa ki nongïalam kiba dei peit ha ki District jong ka Jylla, bad kumjuh ruh ia ki dkhot na Ri Bhoi kiba la wan ban pyniasoh bad ka seng ban shakri ia ka ri bad ka Jaidbynriew. La pynphuh pynphieng ha kane ka sngi da ka jingrwai na u samla S. Marboh.
La ïoh ban pynsngew ia ka jingïaid lynti jong ka seng ha kine ki 15 snem na u general secretary ka seng u Bah Kyllang S Thongni. Ka jingkren na u Myntri Kharlukhi bad Myntri Langstieh kiba la ai ka jingkyrshan kyrdoh ia kane ka seng ba kan nang kiew shaphrang ha kaban shakri ia ka ri bad ka Jaidbynriew.
Kum ka dak ka jinglehkmen ha kane ka sngi la ot ruh ia u cake ka jingdap 48 snem u President bad ka jingdap 15 snem jong ka seng.

Leave A Reply

Your email address will not be published.