Ha ka lyngkhuh sngi ïap u Syiem Tirot Sing khang khyrdep ka KSU ïa ka Masjid ha 4th Furlong

Shillong, Naitung 17: Ka Khasi Students Union (KSU) Shillong Mihngi Circle ha ka sngi Thohdieng ka la khang kyrdep ïa kawei ka Masjid kaba don ha 4th Furlong da kaba kynnoh ba la tei khlem ki kot ki sla bad khlem ioh jingbit.
Ïa kane ka kynhun la ïalam da u organizing secretary ka KSU CEC u samla Cleenstar Shabong bad ïa kane ka leh ha ka lyngkhuh sngi ïap ba 191 jong u Tirot Sing Syiem.
Ka kyrwoh ba la pynmih da ka Union ka la ong ba ka la lap ba katei ka jaka ka dei jong u briew uba nabar, u Nurul Choudhary bad ba ïa katei ka jingtei la shna khlem da ioh ka jingmynjur kiba donkam.
“Ngi la khang khyrdep ïa ka Masjid.Kan dang bteng ban khang tad haduh ban da pynmioh ïa ki kot ki sla bad ban pynshisha kumno la ioh ïa ka jingbit”, la ong ka KSU.
Ka KSU ka la bynrap ba kan dang ïai buddien ïa ki jingshna beaiñ ha ka nongbah.