Ha ka Lehniam Behdeiñ Khlam ïalong ai burom u Ma Sniawbha ïa u CM bad Dy. CM ba kiew ka ri lum Jaintia
Shillong, Nailar 11: Ka lehniam Behdeinkhlam jong ka Seinraij Ialong ka la kut noh ha ka Lah Sngi U Blei ha Aitnar ha kaba ki riewngeit kiba na Raij Ialong, Wahiajer bad Nongkyllep ki la wan ban buh jingduwai ban beh ïa ka khlam jingpang bad ïa ka sniew ka smeh.
Da ki hajar ngut ki paidbah ki la wan ban ïashim bynta ha kane ka shad Behdein Khlam da kaba bud ryntih ïa ki sur kiba mih na ka ksing bad ki tangmuri bad ka jingpyninam ïa ki tabut kiba la shna bad pynitynnad da ki rong ki rup ki bapher bapher kiba don ruh ïa ki kyrwoh na ka bynta ka imlang sahlang ha ka pung ba kyntang.
U Symbud Myntri Rangbah ka Jylla u Ma Sniawbhalang Dhar, uba la ïashim bynta kum u Kongsan ula ïaroh ïa ka jingwanrah ïa ka jingkylla ha Ialong.
“Nga dap da ka jingkmen ban ïohi ïa ka jingkhuid bad ïa ka jingkylla jong ka Ialong, khamtam ïa ki lynti ïaid, ki surok bad ka pung ha Aitnar ïa kaba ngi lehkmen ïa ka Behdeiñkhlam man la u snem” ula ong.
U Ma Sniawbha ula ai burom bad ka jingïaroh ïa u Myntri Rangbah ka Jylla u Conrad Sangma bad ïa u Symbud Myntri Rangbah u Bah Prestone Tynsong kiba la wanrah ïa ki kam pynroi ha ka thaiñ bad ula ïaroh ruh ïa u MLA ka thaiñ u Ma Wailadmiki Shylla uba la tynruh sha ka sorkar ïa ki mat kiba ïadei bad u paidbah.
Ula kyntu ruh ïa ki paidbah ba ki dei ban pynneh pynsah bad ban ïada ïa kine ki jingdon jingem kiba thymmai.
“To nang ïai kiew shaphrnag katba nang mih ki snem bad to ai ba ka jingkiew kan pynsuh thied ïa ka jingieid ka jong phi ïa la ka niam bad ïa la ka kolshor tynrai” ula ong ïa ki riewngeit jong ka niamtre.
Katba u Myntri ka Koit ka Khiah bad MLA ka thaiñ u Ma Wailadmiki Shylla, kum u Symbud Kongsan ula ong ba ka jingshna pynbha ïa ka pung kam long shuh kaba dap da ka ktieh.
“Mynshwa kane ka pung ka long kaba btuid bha. Mynta u snem kam don ktieh shuh namar ba kala wan ka kam pynroi. Ka Ialong ka dei hok ban ïoh ïa kane” ula ong bad ka kyntu ïa ki nongshong shnong ba kin ïarap ban pynneh pynsah ïa kine ki jingtei.
Ha kane ka jingleh niam la don lang ruh ki nongïalam na ka JHADC, ki Dolloi bad ki nongïalam niam.