Ha ka jingleit jurip, ïathuh u Myntri ba la sdang pynkhuid ïa ki jaboh na ka wah Ganol

Shillong, Jymmang 27: U Myntri ka tnat Bording u Abu Taher Mondal ha ka sngi baar u la leit jngoh ïa ka Ganol Dam bad ka Powerhouse ban khmih bniah halor ka jinglong jingman kaba dei bad ka jinglang ki jaboh jabaiñ hapoh ka wah Ganol na ka daw jong ka jingjur palat u slap.
“Ki daw hi jong ka jinglang ki jaboh ka dei na ka jingwan tuid ki jakhlia na ki ïew, ki picnic spot, ki dukan bad kumjuh ruh na ka daw jong ki hab ki sla na ki dieng bad ki seij. Na ka daw jong ka jingjur u slap ka um kaba tuid ka la rong bad rah lut ïa ki jaboh sha kane ka dam,” ïathuh u Mondal.
U la bynrap ba bun na ki jaboh la dep ban pynkhuid na ka jaka bad na ka liang ki nongtrei ki la nang pynkhuid ïa ka jaboh kaba dangsah.
U Myntri ka tnat Bording u la pyntip ruh ba u deputy commissioner ka West Garo Hills u la sdang ïa ka kam bad kumjuh ruh kiwei ki tnat ki la shim ïa kane ka kam bad ki briew kiba dei ban pyndep bad ki committee ban khmih khnang ba kan ym don ka jingbret jaboh ha ki ïew bapher bapher bad ha ki shnong ki thaw.