Shillong, Naitung 11: Ki jingïalehkai ka lympung Shilong Sports Association Fourth Division 2024 ba la long hynne ka Sngi Palei (11 tarik Naitung, 2024) ki la jam sha kaba kut ha kaba ka Umrynjah SC bad ka Laitlulang SC ki la khur ïa ka jingjop.
Haba phai sha ka jingïakhun kaba long ha SSA Groundm, ka Umrynjah SC ka la lah ban pynliem noh ïa ka Lumpyngngad SC da 3-1 kol ban khur pura ïa ki lai point ba konsan lyngba ka hat trick na u Wanboklang L Nongbri.
Ha ka jingïakhun, dei ka Lumpyngngad SC kaba la ïoh mynsiem ban lamkhmat ïa ka jingïalehkai lyngba ka shi kol na u Viangcolas kharbyngngar tang hadien 4 minit ba la ïaid ka por. Hynrei kane kam shym la neh slem, naba ka Umrynjah SC lyngba u Wanboklang L Nongbri ka la pynïakhaid ha ka 11 minit shuwa ban pynbud sa ar kol ha ka 35 bad 55 minit.
Ha ka jingïakhun kaba la long ha MFA Turf, la sakhi ïa ka Laitlulang SC kaba la pynliem 2 kol ïa ka Laitkroh SC. Kine ki ar kol na bynta ka Laitlulong SC la thep da u Pynskhemlang Lyngdoh ha ka 6 bad 67 minit.
Ka jingïalehkai mynta ka sngi, ka Mawpdang SC pyrshah ïa ka New Challenger SC, ha ka por 1:45 baje, ha Third Ground, nangta ka Mawlyngngad SC pyrshah ïa ka Umiew Maw U Sam SC, ha ka por 4 baje nohphaisngi ha Third Ground.
