Dy. CM: Ka Block I bad II kim dei ki jaka ba ïakajia, la pynïasoh sha Karbi Anglong ban jan ka jingsynshar

Shillong, Nailar, 26: Ka Sorkar MDA ba la ïalam da ka NPP ka la buh thong ban pynïoh ïa ka Block I bad Block II sha ka jylla Meghalaya ha ka jingïakren pynbeit pud ha ka wat kaba ar bad ka Assam na ka bynta ban ïapynbeit ïa ki hynriew tylli ki jaka kiba dang sah ha ka jingïakajia pud.
U Symbud Myntri Rangbah ka Jylla u Bah Prestone Tynsong u la ong ba ka Block I bad ka Block II kim dei satia kiba hap hapoh ka jingïakajia pud.
Katkum ka jingong jong u, ki don tang 10 tylli ki shnong kiba hap hapoh ka jingïakajia pud bad ïa ka Block I bad Block II la pynïasoh sha Karbi Anglong lyngba ka jingpynbna (notification).
“Mynta ngi hap ban pynïoh biang ïa ki (Block I bad Block II) sha ka jylla Meghalaya,” ong u Bah Tynsong.
Katkum ka Notification ba la pynmih ha ka 13 tarik, Ïaiong, 1951, ka Block I bad Block II ki dei ki jaka ba la buhai shnong da ki Khasi bad Jaiñtia kiba la shah pynngat sha Assam.
Haba pynpaw ïa ka jingkyrmen ba ka jingïapynbeit pud ha ka wat kaba ar kan pynmih ïa u soh uba thiang u Bah Tynsong u la ong, “kijuh ki kyndon, kijuh ki jingmut bad kijuh ki phormula yn sa pyntreikam ïa kane ka jingïapynbeit pud kaba ar ïa kaba yn sa shim beit katkkum ka mon jong ki paidbah.”
“Ngin sa pyntreikam da kijuh ki kyndon kumba ngi la leh ha ka wat kaba nyngkong. Kan sa don ka jingïasyllok, ka jingleit sorjamin ïa ki shnong kiba don ha ka jingïakajia pud bad ngin sa shim ruh ïa ka jingai jingmut jong ki paidbah,” u la bynrap.
Ha ka 21 tarik, Nailar, ka Sorkar Meghalaya bad Assam ka la pynsdang ïa ka jingïakren pynbeit pud na ka bynta ka wat ka baar da kaba shim rai ban thaw ïa ki 3 tylli ki regional committees hapoh 15 sngi, bad ban wad ïa ki lad ki lynti ban pynkut noh shi syndon ïa ka jingïakajia pud ha ki hynriew tylli ki jaka.
Ka jingïalang kaba la long ha pdeng u Myntri Rangbah ka Jylla Meghalaya u Conrad K Sangma bad u Myntri Rangbah ka Jylla Assam u Himanta Biswa Sarma ki la rai ban kynthup lang ïa ka Karbi Anglong Autonomous Council (KAAC) ha ka Regional Committee.
Haba kylli, u Bah Tynsong u la pyntip ynda la thaw ïa ki regional committee yn sa kynthup lang ïa ka Khasi bad Jaiñt Hills Autonomous District Councils na ka bynta ban ïasyllok bad ban ïoh ïa ki dulir ba donkam.
“Nalor ki ADC, ki regional committee kin sa lum lang ïa ki kynhun bapher bapher, naduh ki khlieh nongsynshar, ki Hima, ki Doloi ban ïathir ïatai halor kane ka mat kaba la sahteng la san phew snem kynthih,” u la bynrap.
U Bah Tynsong u la ong ba ka dei ka mon jong ka Sorkar ban ïapynbeit noh ïa ka jingïakajia pud shwa ban leit sha ka Elekshon ha u snem 2023. “Hynrei, ka shong pat ha ka jinglong jingman kumba ka long ha ka wat ïapynbeit pud banyngkong, kaba shimpor ïa ngi da ki bnai (ban shim ïa ka rai),” u l ang.
Ha kaba ïadei bad ka jingdawa jong ki kynhun ban wanrah biang ïa ki lai tylli ki shnong ka Mallang Hahuapara (ba la tip mynshwa kum ka Okgipu Chiring), ka Mallang Joypur bad ka Mallang Salbari, kiba hap hapoh ka Nongbak Aking bad ha ka Hima Nonglang, u Symbud Myntri Rangbah u la ong ba ïa ka kaiphod ba la aiti da ka Sorkar Meghalaya ha u snem 2011 ka dei ka dulir ba shongaiñ bad kine ki lai tylli ki shnong kim shym la don satia ha kane ka thup jong u snem 2011.