Donkam Police Out Post ha Mookoiram ba shah khrong khajna ki nongrep ha ki briew ka Assam: Dawan Lyngdoh

Jowai, Nohprah 29 : U MDC ka Mynsngat-Khanduli ma Dawan Lyngdoh uba long ruh u kyrtong ka UDP ban ïakhun ïa ka Election MLA 2023 na ka 1-Natriang Constituency ha ka jingkren bad ki lad pathai khubor ula pynsngew ïa ki jingeh ba ki nongshong shnong ha khappud ki ïa kynduh bad ka Assam (Karbi Anglong) kata naduh ka Khanduli, Lapangap, Mookoiram bad ka Artiang sanphaw jong ka West Jaiñtia Hills District.
Na ka liang u ma Dawan lyngdoh ula ong kumba long mynta ka jingeh hi ka long ba ki briew ka Assam man ka por ki shait pynshitom ïa ki Khasi Pnar da kaba daiñ kuna ïa ki mar ki mata jong ki ha ka por ba leit bri, ula ïathuh ruh ha ki bynta ka shnong Mookoiram, Khanduli bad ka Artiang Sanphaw ki don mynta hapdeng ka jingshah teh shahkhum ha ki bor jong ka Assam kaba la buh syndon da ka Forest Check Gate bad ka Battalion Camp ban ïoh lum khajan na ki nongrep.
Hynrei na ka liang ka sorkar jylla Meghalaya haduh mynta kam shem la peit ïa kane ka jingeh jong ki nongshong shnong kiba don ha khappud, kumta u buh ka jingkyntu jur ba ka por kala dawa ïa ka Meghalaya ban don noh ïa ka Police Out Post ha Mookoiram khnang ban lait na ka jingshah apthap da ki pulit Assam ha ka por ba pynkit ïa ki mar rep.
Utei u MDC ula ïathuh man ka por ki briew jong kitei ki shnong kynthup ïa ka Khanduli, Lapangap, Mookoiram bad ka Artiang Sanphaw ki ju shah pynshitom ha ki briew ka Assam wat lada ki don ki kot ki sla ba biang ban pynshisha ba ka jaka jong ki ka dang hap hapoh ka jylla Meghalaya lyngba ka jingithuh jong ka Jaiñtia Hills Autonomous District Council.
Halor kane ka jingeh na ka liang jong u kum u MDC ka thaiñ ula dep ban ïakren bad ban pynsngew ïa kane jingeh sha ka sorkar jylla wat sha ki bor ka Karbi Anglong kumjuh khnang ban pynneh pynsah ïa ka jingshong suk shong shngaiñ jong ki nongshong ha ki bynta khappud.
Shuh shuh ula pynsngew sa kawei ka jingeh “shisien ba ki pulit Assam kila ïoh ban rah ïa ki kali jong ki briew ka jylla Meghalaya kala shem jingeh bha ban leit pyllait ïa ki shaduh sha Kheroni, Hamren kiba la don da ki phew tylli namar ka jingbiang ki pulit ap pahara kiba ym ai lad satia ban rung shapoh u pud u sam ka Assam”.
Ula ong ruh ba ka sorkar Assam kala nud ruh wat ban wan kam ïa ki jaka jong ka Meghalaya namar ka jingbiang jong ka ïa ki pulit kiba don ha khappud, wat ïa ki kam ba rit kiba mih ki jingïa khajia na ka liang jong ki pulit ka Assam ki kloi ban leit mih mar mar katba ki pulit jong ka Meghalaya pat ka shim ïa ki ban wan jurip ha ki jaka ba ïa khajia.
Ha ka juh ka por utei u MDC ka Mynsngat Khanduli Constituency ula pynrem jur halor ka jingwan inspection ki briew jong ka Karbi Anglong bad u MLA MDC ka Karbi Anglong ïa ka jaka ban buh BOP kaba dei ka jaka ka Shnong Lapangap kaba dang hap ha West Jaiñtia Hills District Elaka Shiliangmyntang.
Ula ong ruh bay m lad satia ban pdiang ïa kane ka jingleh donbor ka Assam bad u kyrpang ïa ka sorkar ban shim khia bad ban tuklar ïa kane shwa ban jia ki jingjia ba sngewsih namar lada ka Assam ka ïoh lad ban buh ïa kane kan long ka jingeh ïa ki briew kiba shong bashah sha kine ki jaka.
Ka sorkar Assam ka la dep shna jubor ïa ki surok wat lada ki paidbah ki pyrshah kumta ïa kane ka BOP na ka liang ki briew jong ka shnong Lapangap kim ailad wat tang ban sdang ruh lada ka Assam ka sdang kila kren shai ba kin pyni syndon da ka bor jong u paidbah.