Nongpoh, Nohprah 29: Ki paidbah ba ïaid ba ïeng ha sor Nongpoh mynta ka janmiet ki la lait na ka jingmynsaw, kaba dei hadien ba ka la don ka jingbthei jong ki bom pataka bad ki bom bula ba la die hapoh ka kali harud jong ka surok ïaid paidbah ha sor Nongpoh.
Kane ka jingjia ka la jia mynta ka janmiet ha ka por 5.30 ei ei janmiet, ha kaba la don kiba wan thied ïa kitei ki tiar pynbthei ban leh sngewbha, hynrei ha ka jingpyrshah ban thang u la kem ding kynsan bad bthei bad pur ruh sha kiwei kiwei ki kynjan bom ba pynbthei ba ju lehkmeh ha ka por lehkmen kum ha ka Christmas, snem thymmai bad kiwei kiwei ki leh niam sngewbha.
U trai ba die ïa kine ki tiar pynbthei la tip kyrteng kum u Meshan Nongrum na ka Shnong Umsning bad u la ju wan die ïa kitei ki tiar pynbthei ban lehkmen ha kino kino ki jinglehkmen da ka Kali Maruti Van kaba don ïa u number ML 10 B 3580 bad mynta ka janmiet pat da ka jingbakla ban pyrshang ban thang ïa u bom ka la pur lang ruh sha kiwei kiwei ki bom kaba mih ka jingbthei kaba jur.
Ha kane ka jingjia, ym shem la don mano mamno ba mynsaw bad hadien ba la bthei bad la mih ka ding la wan ïarap da ki paidbah ban synreit da ka um bad tang hadien katto katne por la lah ban pynlip noh ïa katei ka jingbthei.
