Donkam jingkyrshan ka sorkar ban ïarap ïa ki briew ban sdang ïa ka kamrep: Bah Gavin

Shillong, Jylliew 14: Ka ïew ki nongrep ha ka sngi saitjaiñ ka la kynjoh sha ka jingdie ïa ki jhur ki jhep sha ka kylla kaba 6 ha kaba kane ka ïew ka la khring ïa kiba bun ki nongthied kiba thrang ban thied ïa ki jhur ba la pynmih bad rep hi da ki nongrep jong ka jylla bad kiba la ong ba kidei jingthung kiba khlem ai dawai bad kiba bha.
Ba la pynlong da ka 1917 iTEAMS hapoh ka tnat Agriculture & Farmers’ Welfare da ka jingkyrshan na ka Meghalaya Farmers’ (Empowerment) Commission, ha kane ka kynti ki nongrep ki la lah ban wanrah ïa kiba bun ki jait jhur kaba ki la ïoh ban kheit kum ki sohsaw, ki sohtrun, u jhur kum u muli bad kiwei ki jait jhur ba ki la pynmih ha kane ka aïom.
Na ka liang u Programme Manager ka 1917iTEAMS u Bah Gavin C. Shullai u la pyntip ba ha kane ka ïew la plie ruh ïa ka jingdie ïa u ice cream ba na Shillong bad kumjuh ruh ka jingbuh ïa ki jait jingïalehkai na ka bynta ki khynnah ba kin ïalehkai ha ka por ba ki kmie ki kpa ki dang pynlut ïa ka por ban leit thied ïa ki jhur ki jhep na kane ka jaka.
Katkum ka jingong jong u, ki nongrep jong ka jylla ki donkam ban pynmih bun ki jait jhur bad ki soh, naba bun ki karkhana ki donkam ïa kine ki jhur bad ki soh da ki hajar metric ton. U la bynrap, “Ngi khmih lynti kham bun ki jingïarap bad jingkyrshan na ka sorkar, khnang ba bun na ki briew kin ïoh mynsiem ban sdang ïa ki kam rep kaba long kaba kongsan bha ha ka jylla.”
Hapoh kane ka ïew la wanrah ruh ïa kiba bun ki jait sohtrun ba la khot da ki Mauritius ba la wanrah nabar ka jylla.
Kane ka ïew ka pynkynmaw ïa ka jingïohi jngai jong u Myntri Rangbah ka jylla u Conrad K. Sangma ban pynkhlaiñ ïa ki lad kamai kajih jong ki nongrep ha ka kam rep kam riang, ban kyntiew ïa ka kam rep kaba khlem ai dawai, bad ban ai jaka ïa ka jingdonkam ka jingïasyllok hapdeng ki nongrep bad ki nongthied markhmat khlem da don ki riewpdeng.
Kumba long mynta ka jylla ka la lah ban thung bun jait u Kew bad ki Queen Pineapple. Lah ban pynkynmaw ba ha ka kylla kaba san jong kane ka ïew la lah ban die ïa ki sohniamtra, ki sohmanir, ki kait bad ki sohshan.