Dei ka sorkar jylla kaba dei ban pynbeit ïa ka jingeh jong kiba ïakhih kwah tih dewïong: Bah Bindo

Shillong, Jylliew 15: U Symbud Myntri Rangbah barim ka sorkar jylla u Bah Bindo Lanong u la ong ba kiba ïakhih ban ïoh tih dewïong ki dei ban buh ïa ki jingeh jong ki hakhmat jong ka sorkar jylla bad ka sorkar ka dei ban lah ban pynbeit ïa kane ka jingeh.
“Ka jingpynbeit ïa kane ka jingeh ka shong bad ka sorkar jylla. Ka Supreme Court ka la dep ban pynpaw ïa ki aiñ jong ka halor kane ka kam kata ba kane ka dei ka policy halor ka kam tih dewïong. Mynta ka shong ha ka sorkar jylla kumno ban ïarap ïa kiba tih dewïong kiba rit hapoh jong kata ka policy. Lada ka jylla kam kren bad pynbeit ïa kane ka jingeh, kumta ki nongtih dewïong kiba rit kin ïaibteng ban mad ïa ki jingbym sngewsuk,” u la ong.
Na ka liang u Bah Lanong u la ong ba ka sorkar jylla ka dei ban shna ïa ki kyndon na ka bynta ki nongtih dewïong kiba rit bad kumjuh ruh ïa ki trai jaka bad kumno ban ïarap ïa ki hapoh ka jingpynbeit jong ka hukum ka Supreme Court.
“Nga ai jingmut ïa ka sorkar Meghalaya hapoh ki kyndon jinglong jingman bad hukum jong ka Supreme Court ba kadei ban beit ïa kane ka kam jong kiba tih dewïong kiba rit, kumno ban thaw ïa ka jaka bad ym dei ban leh klet ïa ki,” u la ong.