Dei ban phah tohkit ïa ka jingdonkti ki mynder ha ka jingïakynad jaidbynriew ha Manipur : dawa ka NEIPF

Shillong, Jylliew 07 : Ka North East Indigenous People’s Forum (NEIPF) ha ka sngi Ba-ar, ka la dawa ïa ka Sorkar Pdeng bad ka Sorkar Manipur ban leh eiei noh mardor halor ka “jingrung kyrthep ki mynder ri” ha ka thaiñ Shatei Lam Mihngi, kaba la pynkylla dur ïa ka jingdon paid ki jaidbynriew trai muluk ha ka thaiñ.
Ka NEIPF ka la dawa ruh ïa ka Sorkar Pdeng ba kan tohkit halor ka jingdonkti jong ki Mynder Ri ha ka jingïakynad pher jaidbynriew kaba jia mynta hapoh ka Jylla Manipur jong ka thaiñ Shatei Lam Mihngi ka Ri.
Kane ka jingdawa kala mih na ka jingïalang Special Executive ki 27 ngut ki Nongïalam ka NEIPF kiba la ïakynduh ban shong bishar kam halor ka jinglong jingman ha Manipur. ïa kane ka jingïalang la pynlong ha Bhagawati Prasad Baruah Bhavan, ha Guwahati.
Kat kum ka jingong ka NEIPF, baroh ki Kuki kim dei satia ki poiwir na Ri Myanmar hynrei ha ki khyndiat snem ba la leit, bun bah ki jaidbynriew Kuki-Chin ki la wan na Myanmar bad leit shong shnong ha ki Reserve Forest ka Jylla Manipur, kaba la nang pynbun paid ïa ki Kuki-Chin da 30 % hapoh ka Jylla.
“Ngi kyntu jur ïa ka Sorkar Pdeng ban tohkit ïoh kine ki nongwei ki donkti lang ha kane ka jingjia ba mynta ha Manipur. Dei ban leh eiei lada kine ki nongwei ki donkti” ong u Chairman ka NEIPF Anup Chetia hadien ka jingïalang.
Ka jingïalang kala kyntu ruh ïa ki paid riewlum trai jylla ka thaiñ Shatei Lam Mihngi ban long kiba peitngor bha bad ban thaw ïa ki lad ki lynti ha ka ban tehlakam ïa ka jingwan buhai shnong jong ki nongwei namar kine kin pynduh lad ïa ka jingroi ha ka ïoh ka kot ki trai paid riewlum.
Ka jingïalang kala ïakren ruh halor ka jingkhaïi ïa ki jingdih buaid sha ka thaiñ bad ong ba ki jingïoh kurup ïa ki jingdih buaid bad jingpynjot ïa ki khlaw ki btap ha ka thaiñ ka dei kaba sngewkhia jur na ka bynta ki pateng ban wan jong ka Ri.
Ka jingïalang ka sngew ruh ba ka jingkyndang ïa ki briew ba shong beaiñ ha ki reserve forest ka dei ruh kawei na ki daw ba ki jaidbynriew Kuki-Chin kila ïakhun pyrshah ïa ki jaidbynriew Meitei ha Manipur.
Ka jingïalang kala buh ka jingkyntu ïa baroh ki jaidbynriew ha Manipur ba kin ïapynbeit ha kaban ïashongsuk shongsaiñ noh. Kala kyntu ïa baroh ki jaidbynriew ba kin kiar na kino kino ki kam kiba lah ban nang aiding ïa ka jingïakynad.