Beiñ ïa u Bah Ardent ne kynthoh ïa ka VPP, tangba wat ïalam bakla ïa ka mat Reservation Policy : Ardent

Shillong. Jylliew 07: U President ka Voice of the People Party (VPP) u Bah Ardent M Basaïawmoit u la ong ba ka VPP bad ma u kum u nongïalam um don por satia ban kynthoh pyrshah shimet ïano ïano bad ka party kan ym khang ruh ïa kino kino kiba kwah ban kynthoh ïa u ne ïa ka VPP hynrei tang kawei kaba u kwah ka dei ba kim dei ban ïalam bakla ïa u paidbah halor ka reservation Policy.
Haba kren sha ki lad pathai khubor ha ka sien kaba nyngkong eh shitaiew hadien ba u la weng ïa ka jingshah thngan, u Bah Ardent u la ong ba kum ka party kam kwah ban don mano mano ban ïalam bakla ïa u paidbah halor ka Reservation Policy.
“Nga kwah ban kren shai ïa kane ba ki lah ban kynthoh bad ban beiñ ïa ka VPP bad ïa u Bah Ardent tangba sngewbha wat ïalam bakla halor ka Reservaion Policy,” u la ong.
Haba kylli halor ka jingkynthoh u Working President ka UDP ïa ka sienjam ïakhih ka VPP bad u Bah Ardent ban pynbor ïa ka sorkar ban pynkylla ïa ka Reservation Policy, u Bah Ardent u la kyntait ban kynthoh kylla bad ong, “Ka jingïaleh jong ngi kam dei pyrshah ïa uno unoene kano kano ka riew shimet ne pyrshah ïa kano kano ka kynhun jaidbynriew hynrei ka jingïaleh ka dei beit bad ka sorkar ban dawa pynbeit thymmai ïa ka Reservation Policy bad kum ki nongïalam ngim don por ban kynthoh shimet ïano ïano hynrei ngin ïai trei la ka kam,” u la ong.