Shillong, Naitung, 18: Ka All Meghalaya 4th Teachers Association ha ka sngi Palei ka la ïakynduh ïa u Myntri ka tnat Pule Puthi ka Sorkar Jylla u Rakkam A. Sangma ban kyrpad ïa ka Sorkar ba kan kyntiew noh ïa ka tulop jong ki 1521 ngut ki 4th Teachers ha ka jylla.
U President jong ka Association u Tengsrang Sangma u la ong, “ngi la ïakynduh ïa u Myntri ka tnat Pule Puthi mynta ka sngi bad ngi la kyrpad ïa u ban pynsngew ïa ka jingdawa sha u Myntri Rangbah ka Jylla ban kyntiew noh ïa ka tulop jong ki nonghikai 4th Teacher ha ka jylla.”
U ong ba ka ki nonghikai ki sngewsih namarba ka Sorkar Jylla kam siew ïa ka tulop kaba ïaryngkat bad kiwei pat ki nonghikai jong ki skul upper primary na ki skul SSA ne ki skul adhoc.
“Namarakta ngi dawa ïa ka tulop kaba ïaryngkat bad ka jingtrei,” u la bynrap.
Katkum ka jingong jong u, ka jingpynkiew khatduh ïa ka tulop jong ki nonghikai 4th teacher ka long na ka T. 12000 sha ka T. 18000 ha u snem 2022.
