Shillong, Naitung 18 : Ka Executive Member (EM) ka tnat Information Technology jong ka Khasi Hills Autonomous District Council, Kong Grace Mary Kharpuri ha ka sngi Palei ka la ong ba ka la ïoh pdiang ïa ka jingai jingkheiñ na ka tnad IT kaba ïadei bad ka jingdon ki kor Computer kumjuh ki tiar ki tiar kiba ïadei bad ki Computer.
Haba kren ki lad pathai khubor, ka EM ka la ong ba ka kwah ruh ban pynshai ba kam shym la don kano kano ka jingpynjah klep kumba la kynnoh hynrei kadei beit tang naba ka tnad kam pat lah ban ai jingkheiñ ïa ka jingdon ki tiar ha KHADC.
“Nga kwah ban pynshai hangne ba kam don satia ka jingpynjah klep. Nga la pynshai hapoh ka ïingdorbar kaba dang shu dep jong ka Council ba nga khlem pat ïoh jingkheiñ ïa ka jingdon ki computer ym ba ki jah klep,” la ong ka Kong Grace.
Ka Kong Grace ka la ïathuh ruh ba katkum ki jingkheiñ ba ka la ïoh pdiang ki don 31 tylli ki Computer bad 12 tylli ki dei kiba la dep ban lilam.
Shuh shuh ka ong ruh ba kum ka nongpeit ïa ka tnad ka sngewkhia bha halor kane ka jingong ba ka don ka jingjah klep ki Computer ne ki tiar Computer na District Council.
Nalorkata ka la bynrap da kaba ong, “Ngam don eiei ban ong ne kwah ban pynjah burom ïano ïano namar ba lehse kim pat lah ban ai jingkheiñ ha ka por ba biang, hynrei mynta ka kynti pat hadien ba la mih ka jingkylli hapoh ïingdorbar, ki la lah ban pynkloi ban ai jingkheiñ ïa ka jingdon ki computer bad ki tiar computer.”
Ha kajuh ka por ka EM ka la ai khublei ruh ïa u ‘System Analyst’ ka tnat uba la lah ban pynbit pynbiang ïa ki jingkheiñ baroh kiba ïadei bad kitei ki kor computer.
