Nongstoiñ, Naiwieng 20: Ki paidbah ka thaiñ Rambrai ki dawa na ka sorkar ba ka dei ban pynbha noh ïa ki surok ha ka thaiñ, khamtam ka surok na Rambrai sha Mawlangsu kaba ïaid lyngba ïa ka shnong Phudumbah, Domkohmen bad kiwei kiwei.
Halor kane ka juh ka phang, ki nongïalam ka Federation of Khasi Jaiñtia & Garo People Phudumbah area unit, ki la pynpaw ba ïa katei ka surok la shna naduh u snem 1996, hynrei haduh mynta ka sorkar kam shym la lah satia ban pynbha. Ki la ong ruh ba katba nang mih ki sngi katei ka surok ka la nang sniew nang sniew, kat haduh ba ki paitbah nongleit nongwan ha ki por lyiur, ki la hap ban kyrsum ktieh man la ka sngi kum ki sniang.
Ki la ong ruh ba bunsien ki longkmie kiba ar met kiba la kit na ka bynta ban leit kha khun sha Rambrai PHC, ki la kha noh ha shiteng lynti. Ha kajuh ka por ki la ong ba kaba kham sngewsih ka long ba ki don kiba pang ba shitom kiba la kit ban leit phah sumar, hynrei na ka daw jong ka jingsniew palat ka surok ki khlad noh ha shiteng lynti khlem pat poi ha ki jaka sumar.
Na ka liang ki nongïalam ka seng ki la ong ba lada ka sorkar jylla kam sngew lah ban thaw lad ban pynbha ïa katei ka surok, ka la dei ban aiti noh sha ka sorkar pdeng ba kan pyntrei lyngba ka PMGSY skhim kumba la leh ïa baroh ki surok ha kylleng ki jaka. Ki la ong ba lada ka sorkar kam pyni kano kano ka dak ban pynbha ïa katei ka surok, na ka liang ka seng kam banse ban ïaid da kawei pat ka lynti.
