Shillong, Nailar 29: Ka Seng Voice of the People Party (VPP) lyngba u President bad MLA jong ka Nongkrem, u Bah Ardent Miller Basaïawmoit, u la wanrah da ka Call Attention Notice halor ka khubor kaba la mih ha ki lad pathai khubor halor ka jingtreikam ka MPSC bad khamtam eh ha kaba ïadei bad ka jingpynmih result thungkam.
Haba wanrah ïa kane ka mat mynta ka sngi ha ïingdorbar, u Bah Ardent i la ong ba ka sorkar kadei ban wanrah noh ka jingtreikam ban pynthymmai ïa ka jingtreikam ka MPSC kadei namar ba ka la duh ïa ka jingshaniah jong ki paidbah khamtam ki samla wadkam wadjam bad kam long shuh ka bor kaba laitluid, hynrei ka la treikam hapoh ka jingpynïaid ki Politician. Ha kaba ïadei bad ka eksam MCS, u Bah Ardent u la ong ba ka MPSC ka la pynmih bun tylli ki Notification na kawei ka tarik sha kawei ka tarik bad na uwei u bnai sha uwei pat bad wat ïa ka result ruh la pynban arsien, kata ruh ha ka jingïapher kaba haduh hynñiew bnai. Kane ka rukom treikam ka MPSC ka la pynlong ïa kiba bun ki Samla ban leit wad kam noh shabar jylla namar ka jingbym shaniah shuh ïa ka Commission.
U la ai jingmut ba ka Commission kadei ban don ka Confidential Section, kaban peit na ka bynta ban shna ia ki jingkylli khnang ban lah ban pynngat ïa kito kiba leh bakla.Nangta ban thaw ïa ka Moderation Board ka ban peit ïa ki jingbakla ki jingjubab bad ki result. Nangta ban don ki Panel of Question Setters na ka bynta ki Class I Post, khnang ban ïada ïa ka jinglait tuh ki jingkylli. Nangta u la ai jingmut ruh ban don ka rukom ai mark da ka percentage na ka bynta ki eksam kiba don ka written bad personal interview katkum ka jingbthah ka Supreme Court.
U Myntri Rangbah ka jylla, u Conrad Sangma, uba la wan shong dorbar biang hadien ba u la shah sumar ha Civil Hospital Shillong, u la kyntait ïa kane ka jingkynnoh u MLA Nongkrem da kaba ong ba kaei kaba la mih ha kane ka kot khubor halor ka jingtreikam ka MPSC ka long kaba bakla haduh katta katta, khamtam eh ïa ka jingkynnoh ka kot khubor ba ka khun jong u Secretary ka MPSc ka la pass ïa ka eksam MCS ba la pynlong da ka MPSC.
U Conrad u la ong ba kam don kano kano ka kyndon kaba khang ïa ki khun ki kti ne kiba haïing hasem jong ka ki dkhot ka MPSC ban ïakhun ïa ka eksam ba pynlong da ka Commission. U la ong ruh ba kam long kaba shisha ba ka khun jong u Secretary ka MPSC ka la pass ïa ka eksam MCS, da kaba kubur ba ka la pass shisha ïa ka eksam LDA.
