Dawa ka Synjuk ki Rangbah Shnong Ri-Bhoi ban tohkit bniah halor ka jingïap ka samla ha Rajasthan

Nongpoh, Ïaiong 30: Ka Synjuk ki Rangbah Shnong Ri-Bhoi District kala pynpaw ka jingsngewsih bad sngewkhia kaba jur halor ka jingkhlad noh jong kawei ka samla lud na Ri-Bhoi ha jaka sah jong ka haka skulbah ba ka pule ha jylla Rajasthan haka rukom kaba ym lah ban pdiang, wat ki kmie ki kpa bad ki bahaïing hasem kim lah ban mutdur ban ngeit ïa katei ka jingjia kaba la pynpait dohnud ïaki kmie ki kpa bad ki baïeid ba thoiñ baroh.
Haba phah ïaka kyrwoh naka liang u Bah BB Makdoh Chairman ka Synjuk ki Rangbah Shnong Ri-Bhoi District u la ong ba katei ka jingjia ka la wanrah ka jingtieng jingsyier ïaki kmie ki kpa bad ki samla pule ka jylla ban phah trei lane wad jingstad ïala ki jong ki khun shabar jylla, kumba halor katei ka jingjia ki kmie ki kpa jong ka samla Walinda Binong ki suba ba ka lah ban don kaei kaei sha lyndet, bad kim lah ban ngeit ba ka khun jong ki kan phasi bad dih bih kumba la kynnoh da ki bor pynïaid jong ka skulbah Mody University.
Halor katei ka jingjia naka liang ka Synjuk kala dawa naka sorkar bad ka tnad pulit jong ka jylla ba kadei ban pynlong ka jingtohkit kaba bñiah halor katei ka jingjia, ban lap ïaka daw tynrai namar ka rukom ïap ka pynsuba sniew ïaki kmie ki kpa, khnang ba katei ka longiing kan ioh ïaka jingbishar kaba hok namar ban duh kawei ka mynsiem na kawei ka longïing ka dei ka jingduhnong kaba shi jingim kaba ym lah shuh ban ïapeiñ.
U la ong ruh ba kum ka sorkar jylla ka dei ban shimkhia ïa kane ka kam ban ai ka jingshngaiñ ïaki samla pule kiba leit trei lane pule shabar khnang ba kum kine ki jingjia kin nym jia shuh nangne shakhmat.
Hakajuh ka por naka liang ka synjuk kala phah ruh ka kyrwoh sngewlem sha katei ka longiing kaba mad ïaka jingkthang mynsiem ba u Blei ka jingsuk un pyntngen ïa ki kmie ki kpa bad kiba ïeid ba thoiñ baroh.