Shillong, Naiwieng, 26: Ka Khun Hynñiewtrep National Awakening Movement (KHNAM) ha ka sngi Baar ka la dawa ïa ka Khasi Hills Autonomos District Council (KHADC) ban khang dam mardor ïa ki dukan beaiñ kiba don ha shilynter jong ka surok Them Iew Mawlong.
Ha ka dorkhas ba la aiti sha u EM in-charge Trade, u Working President jong ka KHNAM u Bah Thomas Passah u la kynnoh ba mar ïa plie ïa ka surok ha Them Iew Mawlong, ngi la sakhi ïa ka jingmih jong ki dukan bad kiwei kiwei ki kam khaii da ki riewshimet/kynhun ki bym dei ki Khasi ki bym don wat ïa ka Trade License na ka KHADC, kaba paw shai ba ka dei ka jingpynkheiñ ïa ka Trading by Non-Trading Regulation 1954.
“Namarkata, ngi dawa tyngeh ba dei ban khang noh mardor ïa kine ki dukan,” la ong u Bah Passah ha ka dorkhas.
