Dawa ka HITO ïa ka Sorkar ban pynshitom ïa ki Pulit ba kawang Tear Gas ïa ki nonghikai

Shillong, Risaw, 12: Ka Hynñiewtrep Integrated Territorial Organization (HITO) ha ka sngi Balang ka la rai ban leit tur sha ka ophis Main Secretariat bad sha ing sah jong u Myntri Rangbah ka Jylla ban kawang da ki syntiew kum ka dak ban pynpaw ïa ka jingpyrshah ïa ka jingbym lah jong ka Sorkar Jylla ban sospon ïa kiba donkti bad ïa kiba ai hukum ban kawang da ki bom pynsat khmat (tear gas) ïa ki nonghikai skul Kontrak ba la shah weng kam kiba leit tur sha Main Secretariat lem bad ki khun ki kti ha ka 6 tarik mynta u bnai.
Ha ka jingïakren bad ki lad pathai khubor, u President ka HITO u Bah Donbok Dkhar, u la ong, “ngin pynlong ïa kane ka jingïakhih ha ka 14 tarik mynta u bnai ha ka por 11:00 baje mynstep da kaba ïaid paidbah nakhmat u durmot jong u Kiang Nangbah bad ngin sa leit kawang da ki syntiew hakhmat ka ophis Main Secretariat, ha ingsah jong u Myntri Rangbah bad ha ki ophis treikam jong ka NPP, UDP bad BJP namarba kine ki dei ki seng saiñpyrthei kiba ïatreilang haph ka Sorkar Meghalaya Democratic Alliance (MDA).
“Ka Sorkar ka la ai ïa ngi da ka suloi bad ki bom pynsat khmat ha ki ar snem ba la leit noh bad ngin sa pynphai kylla ïa ki da u syntiew ka jingkylla bamut khnang ba kin (nongsynshar) kylla bamut noh na ki pap ki sang jong ki,” la ong u Bah Donbok.
U la ong ba ka Seng kala dawa ïa ka Sorkar Jylla ba kan sospon noh mardor ïa kiba donkti ban ai hukum bad ïa ki arngut ki Pulit Ophisar kiba kynthup ïa u Dy. Superintendent of Police (Dy.SP) ban kawang da ki bom pynsat khmat ïa ki nonghikai, kiba pynlong da ka jingïakhih kaba jai jai.
“Katba ka Sorkar kam pat sospon ïa kiba donkti ha kane ka jingjing, ngin pynlong beit da ka jingïakhih,” u la ong.
Katkum ka jingong jong u Bah Donbok, ki arngut ki Pulit kiba donkti ban kawang da ki bom pynsat khmat ïa nonghikai, u la ong, ba uwei uba la paw dur ha ki video ba la ïoh ring da ki lad pathai khubor u dei u Dy. SP Aiban Diengdoh bad uwei pat u dei u Simsang Sangma.
Haba kylli shaphang ki bor synshar ka East Khasi Hills District ki la pynjari da ka Section 144 CrPC, u Bah Donbok u la ong, “ngam pat ju ïohsngew mynno mynno ruh ban leit ai syntiew ïa ki nongmihkhmat paidbah ka dei ka jingpynkheiñ aiñ. Halor kaei ka nongrim ba kin khanglad ïa ngi ban leit ai syntiew ïa ki (nongmihkhmat).”
U la ong shuh shuh ba ka Sorkar Jylla ka ka dei ban sangeh noh ban pynbitar ïa ki seng bhalang namarba ki Pulit ki lah ban kiar na kaba pyndonkam palat pud ïa ka bor da kaba pyndonkam tang da ki jingker ban pynsangeh ïa ki nonghikai na ka jingleit tur sha Secretariat.
U la ong ba kane ka jingleh jong ki Pulit kam dei ban dang jia shuh nangne shakhmat namarba ki khun jong ki nonghikai bad ki nonghikai kynthei ba dang armet haduh mynta ki dang don hapdeng ka jingsheptieng bad ka jingshah ktah na ka jingshah kawang da ki bom pynsat khmat.