Shillong, Nailar 04: Ka jingjia shah ktah kti jong kawei ka khynnah ka la paw pen ryngkew ha kane ka sngi bad la ong ba katei ka khynnah kadei kaba na West Garo Hills. La kynnoh ruh ba ka video jong kane ka jingjia ka la saphriang ha social media dangshen, ha kaba ha kane ka jingjia ka la pynlong ïa ki nongshong shnong bad ki kynhun sengbhalang ban leit khang khydep ïa baroh ki dukan hadien ba ki la ïoh jingtip ïa kane ka jingjia.
Haba pynthikna ïa kane ka jingjia, ki pulit ka West Garo Hills District ki la ïathuh ba la dep ban pynrung ha ki kyndon ba la shim khia da ka Tura Women Police Station lyngba ki aiñ bapher bapher. Ki pulit ki la ïathuh ruh ba ki la shim ïa ki sienjam ban pynthikna ba kitei ki runar kiba la leh ïa kane ka kam, kiba dang phet rieh haduh mynta, kin ngat ha ki jingshah pynsajia katkum ki aiñ.
“Ngi dang trei minot bad lyngba ki tyllong khubor bad ki bor jong ki technology, ban lap bad ban ïohkem ïa kitei ki runar kiba donkti. Ka thong kaba hakhmat ka long ban pynïoh ïa ka jingbishar kaba hok ïa ka lanot bad ban ïada ïa kum kine ki jingjia ha ki por ban wan. Ngi ai ka burom bad ka jingïaroh ïa ka kynhun peitngor jong ki nongïalam bad ki paidbah nongshong shnong kiba la pynpaw bad ïathuh ïa kane ka jingjia,” ong u Abraham T Sangma, Superintendent of Police ka West Garo Hills, ha ka kyrwoh khubor.
U la kyntu ïa ki paidbah ban long kiba jai jai bad ban shah bad ban ailad ïa ki bor pynïaid jong ki pulit ban shim khia ïa kane ka kam bad ka jinglong jingman. “Kadei lyngba ka jingïashimkhia lang jong baroh ba ngin lah ban thaw pyrthei ïa ka sawdong sawkun kaba shongsuk shongshngaiñ na ka bynta jong manla uwei pa uwei u nongshong shnong,” u la bynrap.
Lah ban kdew ba kane ka kam runar ka la paw pen ryngkew hadien ba ki nongshong shnong bad ki dkhot sengbhalang ki la khynra ïa ka dukan kaba donlang bad ka godown kaba ha ïew Garobadha, kaba don ruh hajan khappud jong ka West Garo Hills bad South West Garo Hills District.
Ha ka video kaba la saphriang, la kynnoh ba katei ka dukan ka don ka jaka thiah ha ka mala kaba nyngkong bad la kynnoh ba u trai katei ka dukan u la khot ïa katei ka khynnah kaba dei ruh kaba dang leit skul ban wan sha katei ka godown ban leh ïa ki kam ki bym dei satia ïa ka ban leh.
Ki sengbhalang na Garobadha bad South West Garo Hills ki la khang khyrdep noh ïa katei ka dukan halor ka jingkynnoh ba ka la don kane ka jingjia.
